Мәселе жуырда шешіледі
Жаңадан бой көтеріп жатқан "Юбилейный" шағын ауданындағы 24-ші үй былтыр ғана пайдалануға берілген болатын. Арада көп уақыт өтпей тұрғындары коммуналдық мәселелері бойынша әкімдікке шағым түсірді. Өйткені аталған үйдің тұрғындары әлі күнге көгілдір отынсыз отыр. Оның үстіне, тұрғын үйде ыстық су, жылу жүйесі де дұрыс емес.
Жағдайдың себебін әкімдіктегілер қоныстанғандардың тізімі тұрғындар тарапынан дұрыс берілмеуімен түсіндіреді. Қалалық тұрғын үй қатынастары бөлімінің басшысы Сақтаған Мұстафин жуырда бұл мәселенің шешілетінін айтады.
"Бұл мәселемен тапсырыс берушілер өздері айналысып жатыр. Бізге келіп түскен мәліметтерге сәйкес, өткен жылдың желтоқсан айында газ беру тетіктері толық орнатылып болды. Жуырда тұрғындар толық қоныстанып болды деген ақпарат алдық. Ыстық су, жылу мәселесіне келсек, құрылысқа жауапты компаниялардың тарапынан қателік кеткен. Бүгінде бітелген құбыр желілері толық тазартылып, қалған жұмыстары реттелді", -дейді бөлім басшысы.
Айбек Ғалымұлы.
