«Тұғыры биік Тәуелсіздік!» кітап көрмесі
Тәуелсіздік күні еліміздің барлық азаматтары үшін орны ерекше мереке деп білеміз, себебі осынау жүрекжарды қуанышқа толы күнді ата-бабаларымыз ғасырлар бойы армандап, күтумен өтті. Осы 16 желтоқсан ҚР Тәуелсіздігі күніне орай Амантоғай ауылдық кітапханасында «Тұғыры биік Тәуелсіздік!» атты кітап көрмесі ұйымдастырылды.
Басты мақсаты: ата-бабамыздың тәуелсіздік жолындағы ерлігін үлгі етіп, Тәуелсіз Қазақстан Республикасының өткені мен болашағы, даму тарихы туралы мағлұматтар бере отырып, келешекке сеніммен қарауға, елжандыққа, ұлтын сүюге, қастерлеуге үйрету. Өз Отанына, туған жеріне деген сүйіспеншілігін арттыру. Өз ана тілін, әдет-ғұрпын, салт-дәстүрін сақтауды оқырмандардың бойына дарыту.
Кітап көрмесі еліміздің тәуелсіздік алған сәтінен бастап бүгінге дейінгі жүріп өткен жолы туралы қаламгерлердің жазған еңбектері мен тәуелсіздік жылдарында баспадан шыққан әдебиет туындыларымен қамтылды.
Көрмеде сонымен қатар Қазақстанның тәуелсіздігінің қалыптасуы мен дамуы туралы баяндайтын, олардың ішінде: Н.Назарбаевтың «Тәуелсіздік дәуірі», Ә.Әлеубек «Болашағына қол созған Қазақстан», К.Адырбектың «Тәуелсіздікке талпыныс», М.Қозыбаевтың «Киелі Тәуелсіздік», М.Жолдасбековтың «Тәуелсіздік тағылымы», Ә.Нысанбаевтың «Тәуелсіздік. Демократия. Гуманизм» шығармалары ұсынылды. Онда тәуелсіздікке жету жолындағы халқымыздың бастан өткерген тарихы туралы кеңінен мағлұматтар берілді. Іс-шараға Амантоғай ауылдық ардагерлер кеңесінің төрағасы Ж.Тапаев, Амантоғай ауылдық мәдениет үйінің меңгерушісі А.Әмірғазин, ауылдық округі әкімі аппаратының бас маманы Ж.Қарқабатов қатысты.
Тәуелсіздігіміздің тұғыры биік, халқымыздың еңсесі жоғары, егемендігіміз баянды болсын!
Айнұр ҚОЙЖІГІТОВА,
Амантоғай ауылдық кітапханашысы.
