Жалған ақпарат тарады
WhatsApp мессенджерінде «Жангелдин ауданында қайғылы жағдай болғаны» туралы жалған ақпарат тарап жатыр. Хабарламада Торғай ауылында Саят деген жігіттің 9 адамнан тұратын отбасы қайғылы жағдайға душар болғаны айтылады.
«Газ баллоны жарылып, үйдің шатыры көкке көтеріліп, баспана түк қалмай өртеніп кеткен. Үй ішінде Саяттың анасы және әйелі Гүлжанат және 2 бала жанып кеткен. Денесін 80% күйік шалған інісі, келіні және балалары ауруханада қиын жағдайда жатыр. Жан-жаққа жіберіңдерші, әр жіберген хабарламаға 26 теңге түседі екен», – делінген желіде тараған мәтінде.
Ал шындығында бұл қасіреті жағдай Торғай кентінде осыдан екі жыл бұрын болған еді. Оқырмандарымызды бірер күн шамасында WhatsApp мессенджерінде тарап жүрген осы хабарламаға сенбеуге шақырамыз.
