Ат тұяғы дүбірлеген күн
Заречный ауылындағы «Арғымақ» атшабарында ұлттық ат спорты жарыстарының биылғы маусымашар салтанаты өтті. «Қазақтың қазанаты» атауымен ұйымдастырылған байрақты бәсеке ұлт ұстазы Ахмет Байтұрсынұлының 150 жылдығы мен Балалар жылына арналып отыр. Дүбірлі додаға өңіріміздің аудан-қалаларынан бөлек, Солтүстік Қазақстан, Ақмола, Қарағанды, Ақтөбе, Батыс Қазақстан облыстарынан келген сәйгүліктер бәйгеге түсті.
Ипподромға жанкүйер болып жиналған ағайынның қарасы көп. Трибуна сыртында сауда нүктелері мен ұлттық бұйымдар көрмесі сап түзеген. Сахнада өңіріміздің өнерпаздары әннен-күйден шашу шашты. Салтанатты шараның ашылуында облыс әкімінің бірінші орынбасары Ғауез Нұрмұхамбетов, ҚР Ұлттық ат спорты түрлері қауымдастығының атқарушы директоры Рахат Жақсыбай құттықтау лебіздерін жеткізді.
Бұл жолғы бәйге ойындарында Қостанай қазанатына айрықша мән берілген. Тек Тобыл өңірінен тарау алған Қамбар атаның тұқымы 1000 метр, 1800 метр ұшқыр жарыс, 5 шақырымдық құнан бәйге мен 18 шақырымдық аламанда шауып өтті. Бұдан бөлек, аралас тұқымдылардан 4 шақырымдық құнан жарыс және 16 шақырым қашықтықтағы аламанның да бәсі басым.
Айта кетейік, аралас тұқымды және таза Қостанай қазанаттары арасында өткен аламандарда Ақмола облысының сәйгүліктері топ жарды. Жүйріктердің иесі – түбі қостанайлық Әділет Тасмұхамбетов. 18 шақырымдық аламанның басты жүлдесі – жеңіл автокөлікке қоса 900 мың теңге.
Төменде түрлі қашықтықтардағы бәйге жарыстарының жеңімпаздары және жүлдегерлерімен таныс болыңыздар.
Қостанай тұқымды құнандар арасындағы 1000 м қашықтықтағы ұшқыр жарыс:
І орын Берен (шабандозы Ринат Ертас), ат иесі Ұлттық ат спорты түрлерінен балалар мен жасөспірімдер мектебі (Заречный);
ІІ орын Коржик (шабандозы Матвей Ватюков), ат иесі Ғани Қыпшақбаев;
ІІІ орын Рассул (шабандозы Мария Кариева), ат иесі «Қазақ тұлпары» Қостанай жылқы зауыты.
Қостанай тұқымды құнандар арасындағы 1800 м қашықтықтағы ұшқыр жарыс:
І орынды Гүлжайна (шабандозы Ескендір Белдібаев), ат иесі Нұрбол Әбдрахманов;
ІІ орын Графиня құнаны (шабандозы Любовь Куралина), ат иесі Александр Рудольф (Қарабалық ауданы);
ІІІ орын Фандера (шабандозы Мерей Исин), ат иесі «Қазақ тұлпары» Қостанай жылқы зауыты.
Қостанай тұқымды құнандар арасындағы 5000 м қашықтық:
І орын Қызғалдақ (шабандозы Нұрасыл Ахметов), ат иесі Арман Еспергенов (Жітіқара ауданы);
ІІ орын Қарлығаш (шабандозы Шыңғыс Сайлаубековат иесі Абылай Алшымбаев (Ақмола облысы);
ІІІ орын Бүркіт (шабандозы Вячеслав Курдюков), ат иесі Мұқан Найымбеков (Қарабалық ауданы).
Аралас тұқымды құнандар арасындағы 4000 м қашықтық:
І орын Керемет, Ақмола облысы (шабандозы Шыңғысхан Сайлаубай);
ІІ орын Жұлдыз, Батыс Қазақстан облысы (шабандозы Арыстанбек Қуандық);
ІІІ орын Фаворт, Заречный (шабандозы Нұрасыл Ораз).
Аралас тұқымды жуан аттар арасындағы 16000 м қашықтық:
І орын Тойдуман, Ақмола облысы (шабандозы Тимур Харитон);
ІІ орын Кендибор, Қостанай ауданы, (шабандозы Берік Қалдыбек);
ІІІ орын Ақмоншақ, Ақтөбе облысы (шабандозы Иман Ахметов).
Қостанай тұқымды жуан аттар арасындағы 18000 м қашықтық:
І орын Занзибара, Ақмола облысы (шабандозы Тимур Харитон, ат иесі Әділет Тасмағамбетов);
ІІ орын Алғыр, Қарағанды облысы (шабандозы Әлихан Қайыржан, ат иесі Бүркіт Серікбеков);
ІІІ орын Бәйтерек, Ақмола облысы (шабандозы Дамир Данияр, ат иесі Әділет Тасмағамбетов).
Ат жарысынан бөлек, ежелден келе жатқан «Қыз қуу», «Аударыспақ», «Көкпар» ойындары ұйымдастырылған. Аударсыпақ ойындарында Рүстем Жүгінісовке шақ келген ешкім жоқ. Дамир Әлкеев екінші, Айдос Жұмағұлов үшінші орындар иеленді. Қостанай мен Денисов аудандарының командалары сынға түскен көкпар тартысында Тобыл ойыншылары жеңіске жетті.
Суреттерді түсірген Бағдат АХМЕТБЕКОВ.
