Ғасыр індетінен сақтандырады

"Қостанайдың жас көшбасшылары" қоғамдық бірлестігі облыстық салауатты өмір салтын қалыптастыру проблемалары орталығының тапсырысы бойынша қыркүйек айынан бастап арнайы жобаны жүзеге асыруда.

СПИД пен ВИЧ ауруларының алдын алу мақсатында қолға алынған бұл жоба аясында бірлестік мамандары Қостанай, Рудный, Лисаков қалалары мен Науырзым ауданында болып, тұрғындарға атал-ған дерт туралы, оның алдын алу жайында тегін кеңестер беріп, семинарлар мен дөңгелек үстелдер және "Жарқын болашақ үшін!" деген ұранмен акция ұйымдастыруда. Бірлестік төрайымы Гүлсім Бисимбаеваның айтуынша, үш айға жоспарланған жоба желтоқсан айына дейін жалғасатын болады.

– Елімізде ВИЧ-пен ауыратындардың жыл санап көбеюі бүгінгі медицинаның әлі де болса басты проблемасы. Елімізде жиырма мыңнан астам адам осы дерттің құрығына ілінген екен, соның мың жарымнан астамын шетелдіктер құрап отыр. Өткен жылмен салыстырғанда биыл дертті жұқтырғандар қатары 106 адамға көбейіп отырған көрінеді. Соның ішінде 47 жағдай Қарағанды облысына, 28-і Алматыға, 30-ы Шығыс Қазақстанға, ал 21-і біздің облысқа тиесілі екен. Сондықтан, дертті ауыздықтауда бүкіл ел болып күресуіміз қажет. Біз қолға алған жобаның басты мақсаты да осы, –  дейді Гүлсім Айтжанқызы.

Қарлығаш

         ОСПАНОВА