Аттестациядан өте алмады
Аудан мектептеріндегі мемлекеттік аттестациялау мәресіне жетті. Ағымдағы жылдың екінші жартыжылдығындағы сынаққа Ананьев, Сорочин, Қоскөл және Лесной мектептері қатысты. Білім ошақтары арасынан тек Ананьев бастауыш мектебі ғана сыннан сүрінбей өтті.
Аудандағы қалған білім ошақтарының бірде-бірі мемлекеттік талапқа сай болмай шықты. Департамент өкілдерінің уәжіне құлақ асар болсақ, бұған білім ошақтарындағы білікті мамандардың тапшылығы себеп. Мәселен, аудандағы мектептердің 4, 9 және 11-сыныптарында жүргізілген тексеріс оқушылардың білім мекемелері деңгейінің таяздығын көрсеткен. Мемлекеттік сынақтан сүрінген білім алты айдан соң, қайтадан аттестациядан өткізілетін болады. Ол жолы да білім беру стандартына сай келмесе, мектептер аталған білім беру лицензиясынан қағылуы ықтимал.
Аттестациялаудан өте алмай қалған мектептерде бір кездері талантты тұлғалар білім алғанын айта кеткен абзал. Бұл ауданнан заманының заңғар академиктері де, ғарышкерлері мен ұлағатты ұстаздары, білікті басшы, атақты дәрігерлер де шыққан. Заман түзелді, білім беру жетілдірілді дейміз. Ал, заман талабына сай, техникалармен, оқыту құралдарымен қамтамасыз етіліп, "білікті де білімді" мамандар жұмылдырылған білім ошақтарының бүгінгі тірлігі осы…
Руслан ӘЛКЕЙ.
Сарыкөл ауданы.
