Премьера: «Кішкентай адамның үлкен трагедиясы»
«- Ойбай-ау, рельстің шпалға гайкамен бекітілетінін түсінсеңізші!
– Оны біз түсінеміз… Өйткені, бәрін бірдей суырмаймыз ғой… қалдырамыз… Ақылға салмай істемейміз… түсінеміз…»,
немесе
«- Мен кәзiр құпия қызметке дейiн көтерiлдiм ғой… Екi жұлдызды алып тастадым дегендей…
Сол екен, жiңiшке кiсiнiң бетiнен қаны қашып, сiрестi де қалды, сәлден соң оның бетi қисайып, жайыла күлдi; сол сәтте оның бетi мен көзiнен әлдеқандай бiр ұшқын шашылып жатқандай боп көрiнiп кеттi. Сосын өзi басын iшiне тартып, еңкейе, иiле түстi…».
Орыс жазушысы А.Чеховтың шығармаларында кездесетін осындай диалогтар қай қоғамдағы болсын көп қайшылықты дөп басып тұр.
Драматургтың «Қорғансыз жан», «Қаскүнем», «Жуан мен жіңішке», «Хористка», «Хамелеон» әңгімелері адамның надандығын, билік пен қарапайым шаруа санасының түйіспеуін, жағымпаздықтың жиіркенішті көрінісін, ақшаның алдында адамгершіліктің құнсыздануын, ащы шындықтан қарағанда, тәтті өтірікке құмарлығын, құлдық сананың адам бойына сіңіп кеткенін тап көрсетеді.
Міне, осы оқиғаларды І.Омаров атындағы облыстық қазақ драма театры бір қойылымда тоғыстыруы туындының көтерген тақырыбының өте ауқымды әрі өзекті екенін айғақтап тұр. «Кішкентай адамның үлкен трагедиясы» спектаклінің премьерасы қалжыңсыз комедия жанрында сахналанған.
Күлкілі жайттар көп болуы мүмкін, бірақ оның ар жағында үлкен трагедия жатыр. Қойылым өмір шындығына терең бойлап, қоғам кеңістіктеріндегі әлеуметтік-философиялық тақырыпта ой қозғайды. Адам – өзінің адамгершілігімен, қайырымдылығымен, адалдығымен және әділеттігімен ардақты екендігін естен шығармауы тиіс. Автор құлдық сананың тамшыларын адам бойынан сығып алудың керемет үлгісін көрсетеді. Ол заманауи эффектілерден бас тартып, бетпердесіз шынайылыққа бір қадам жақындата түседі. Ынжықтық, сылбырлық, надандық, екіжүзділік, жағымпаздық айқын бейнеленген.
Қойылымның режиссері – театрдың көркемдік жетекшісі Баатырбек Шамбетов. Труппа өзіне жүктелген міндетті өте сәтті орындап шықты.
Ал туындының ұтқан жері – бір актердің бірнеше рөлді сомдап шығуы. Мұндай дүние бір жағынан сахна адамының кәсібилігін шыңдаса, екінші жағынан кез келген гастрольге ықшамды құраммен шығуына мүмкіндік.
Оқиғалардың қалай өрбитінін көргіңіз келсе, Ілекең атындағы қарашаңыраққа келіңіз. Премьера 14 наурыз күні сағат 17.00-де қайтара қойылады.
