Қытайлық автокөлік өндірушілері Қостанай жеріне келді

Бүгін облыс орталығына ҚХР Джак Моторс Корпарейшн компаниясының директорлар кеңесінің төрағасы Ан Жин мен Бас директоры Се Кайронг бастаған делегация Қостанай жеріне іссапармен келіп, бірқатар кездесулер өткізді.

JAC маркілі жолаушылар және коммерциялық автокөліктер мен ірі автобус шығаратын қытайлық компанияның әлемдік деңгейде беделі жоғары. Атап айтқанда, өз елдеріндегі автоөндірушілердің бестігіне кіреді. Күншығыс елінен келген мәртебелі меймандар түске дейін «СарыАрқаАвтоПром» ЖШС мен «Агромашхолдинг» АҚ-нда болып өндіріс қарқынымен танысты.

Сол жерде «АллюрГрупп» БК директорлар кеңесінің бас директоры Ю.Цхаймен және осы кәсіпорынның президенті А.Лаврентьевпен жүздесіп, Тобыл өңірінде бірлесіп автокөлік өндіру мәселесін талқылады.

Естеріңізге сала кетсек, бірлескен өндіріс орнын ашу туралы келісімге биылғы жылдың тамызында өңір басшысы Нұралы Садуақасовтың Ганьсу провинциясынан келген бизнес өкілдерімен кездесу барысында қол қойылған болатын.

Осыған сәйкес Қостанай облысы мен Ганьсу провинциясы арасында ынтымақтастық орнап, бірнеше тың жобаларды жүзеге асыруға мүмкіндік туды. Түс ауа қонақтарды облыс әкімі қабылдады. Екі жақты келіссөз барысында инвестициялық мүмкіндіктері мен өзара байланысты дамыту жолдары және автокөлік өнеркәсібін дамыту мәселелері сөз болды.  

 

Мешіт Ғазиз

Суретті түсірген Бағдат Ахметбеков