Рудныйда балабақша ашылды

Бүгін Рудный қаласында ҚР Тәуелсіздігі мерекесі қарсаңында "Жас бөбек" аталатын балабақша ашылды. Нысанның тұсаукесер рәсіміне облыс әкімі Архимед Мұхамбетов арнайы барып қатысты. 

310 орынға шақталған жекеменшік балабақша мемлекеттік-жекеменшіктік әріптестік аясында салынған. Бұған 840, 967 млн теңге инвестиция құйылды. Бөбекжай рудныйлық бүлдіршіндер қазақ және орыс тілдерінде тәрбиеленетін болады.

"Әр жыл сайын облыста әлеуметтік жауапкершілікке ие бизнес өкілдері көбейіп келеді. "Елена Д" ЖШС және оның құрылтайшысы Иван Марар мемлекеттік-жекеменшіктік әріптестік механизмі арқасында ғимаратты қалпына келтіріп, оны сапалы материалдық-техникалық базамен қамсыздандырды", – деп атап өтті аймақ басшысы. 

Жаңа балабақшаның ашылуы қаладағы кезек санының 20%-ға қысқаруына себепкер болып отыр. Айта кетейік, таяу жылдары Қостанай қаласындағышағын аудандарда әрқайсысы 280 орындық болатын тағы бес балабақша салу және бұрынғы балабақша ғимараттарын қалыпқа келтіру жоспарда бар. Сондай-ақ Жітіқара және Науырзым аудандарында бір балабақшадан пайда болмақ.

Суреттерді түсірген Бердіболат Көркембаев