Құрметті атаққа кім лайық?
Облыстық мәслихаттың 20-сессиясында "Қостанай облысының құрметті азаматы" атағын беру мәселесі қарастырылды. Бұл мәртебеге үміткер жандарды облыс әкімі Архимед Мұхамбетов ұсынған.
Аймақ басшысының ұсынуынша, аталған атаққа лайық бес адам бар. Олар – ҰОС ардагері, жыршы-термеші, ардагер журналист Қасымхан Алдабергенов, ақын-жазушы, ҚЖО мүшесі, А.Байтұрсынов атындағы ҚӨУ профессоры Ақылбек Шаяхметов, "Москалевский" ЖШС директоры Зейнулла Жаңбыршинов, қоғам белсендісі Бағила Баймағамбетова және "Железнодорожное-АМФ" ЖШС директоры.
"Барлық үміткер Қостанай облысы халқы үшін үлкен абыройға ие жандар екенін айта кету керек. Олардың әрқайсысы өңірдің әлеуметтік-экономикалық және қоғамдық-саяси дамуына елеулі үлес қосқан. Барлық кандидатура облыстық мәслихаттың және қоғамдық кеңестің тұтақты комиссиясының бірлескен отырысында қаралып, бірауызадн мақұлданды", – деді облыстық Ішкі саясат басқармасының басшысы Бибігүл Аққожина.
Басқарма басшысы "Облыстың құрметті азаматы" атағының үміткерлерін жанжақты таныстырып өтті.
Қасымхан Алдабергенұлы АЛДАБЕРГЕНОВ – 1925 жылы туған. ҰОС ардагері. Майдандағы ерлігі үшін ҰОС 2-дәрежелі орденімен, "Ерлігі үшін" медалімен марапатталған. Қазынакеуде қария елге жырлы-термешілік, ақындық, журналистік және педагогтік еңбегімен де танымал.
Ақылбек Кожаұлы ШАЯХМЕТ – 1951 жылы туған. Белгілі қаламгер, драматург, Филология ғылымдарының кандидаты, доцент. Көптеген халықаралық, республикалық сыйлықтардың лауреаты. Оның "Ақсұлу" атты драмалық поэмасы қазақ радиосының алтын қорына енген.
Зейнулла Абаұлы ЖАҢБЫРШИНОВ, 1940 жылы туған. Ауыл шаруашылығы ғылымының кандидаты, Ірі қара малдың ет бағытындағы әулиекөлдік арнайы тұқымының авторы.
Бағила Бірмағамбетқызы БАЙМАҒАМБЕТОВА, 1951 жылы туған. Тарих ғылымдарының кандидаты, Қазақстанның еңбек сіңірген қызметкері, Қостанай облысы әкімінің бұрынғы орынбасары, Мәжілістің 3 және 4 шақырылымының депутаты.
Максим Федорович АРТЕМУК, 1937 жылы туған. Өңірге белгілі меценаттардың бірі. Ол ауылдарды дамытуға және ауылдықтардың әл-ауқатын жақсартуға көп көңіл бөледі.
Облыс мәслихатының депутаттары оларды құрметті азамат атағына ұсынуға бір ауыздан қолдап дауыс берді.
