«Парасатты полицей»

Қазақстан Республикасы Ішкі істер министрлігі Қостанай академиясында «Парасатты полицей» байқауы өтті. Оған төрт команда қатысты.

Сайыстың мақсаты – ішкі істер органдарының қызметкерлері арасында мемлекеттік тіл саясатын кеңінен насихаттау, тәртіп сақшыларының бойында Отанға, еліне деген сүйіспеншілікті дамыту, қызметкерлердің қоғамдағы оң имиджін қалыптастыру, мемлекеттік тілді құрметтеу, мәртебесін арттыру, құқық қорғау қызметкерлерінің парасаттылық рухын көтеру. Қатысушылардың өздерін өлеңмен, ән және бимен таныстырды. «Сегіз қырлы – бір сырлы» деп аталатын үй тапсырмасында қатысушылар полиция қызметінің ерекшеліктеріне қатысты ән немесе өлең шығарды, құқық қорғау қызметкерлерінің оң имиджін қалыптастыру үшін өздерінің ой-толғамдарын ықшам әрі қызықты сахналық көріністермен бейнеледі, өздерінің әндерін тарту етті. Үшінші кезең, «Нар тәуекел» деп аталды. Әр командаға қоғамдағы түрлі оқиғаларға қатысты тапсырмалар берілді. Осы тапсырмалар бойынша қатысушылар өздерінің шеберліктерін, кәсібиліктерін, шапшаңдылықтары мен ұтқыр шешім қабылдауларын көрсетті.  Қазылар алқасының шешімі бойынша  бас жүлдені  2 курс, бірінші орынды  – 4 курс, екінші орынды –  3 курс, үшінші орынды – 1 курс тыңдаушылары  иеленді. Командалар академия бастығының грамотасымен марапатталды.

Гүлназым Сағитова