Алаш арысына құрмет
Биыл Алаш қайраткері, қазақтың маңдайына біткен біртуар азамат, ақын, жазушы, көрнекті көсемсөз шебері Міржақып Дулатұлының туғанына 135 жыл толды. «Оян, қазақ» деп ұлттың рухын сілкіген Жақаң Алаш зиялыларының алдыңғы сапында жүріп, ұлтымыздың сауаттануына, рухани, мәдени тұрғыдан дамуына өлшеусіз үлес қосқан бірегей тұлға.
Оқу-ағарту саласында ауқымы кең, еңбегі ерен жұмыстар атқарып, саналы ғұмырын ұлтының қамын жеп өткен арысымыздың мерейтойы қарсаңында Рудный қалалық «Нұр» мешіті мектеп оқушылары арасында «Арқаның саңлағы – Міржақып» атты байқау өткізді. 7-10 сыныптар аралығындағы 39 оқушы қатысқан бұл танымдық жарыста ақынның шығармалары жатқа оқылып, мағынасына қарай суреттер салынды.
Аталмыш шарада оқушылар көсемсөз шеберінің өмірі мен шығармашылығы туралы білімдерін шыңдай алды десе, артық айтқандық емес. Ал байқаудың сурет салу бөлімі ақын шығармаларына арналған. Балалар өздері сол шығармаларды қалай түсінгендігін, қалай қабылдағанын өздерінің бейнелеуі арқылы көрсете білді дейді ұйымдастырушылар.
«Байқаудың мақсаты – жастарға патриоттық тәрбие беру, көркемсөз оқу шеберлігін дамыту және ұрпақтар сабақтастығын нығайту сонымен қатар өздерінің Міржақып шығармаларымен жақынырақ танысып-білуі» – деді «Нұр» мешітінің имамы Бектұрсын Уәлиев.
Әділ қазылар шығармаларды сарапқа салып, зерделеп, басым түскен жеңімпаздарды анықтады. Мәнерлеп оқу шығармашылығынан Б.Майлин атындағы мектеп оқушысы Жамбыл Тоққажаев бас жүлдені иеленсе, қылқалам сайысынан Карім Рахимов үздік деп танылды.
Айта кетейік, байқауға демеуші болған – «Әділет-Т» ЖШС басшысы Бақберген Қасымұлы Өтеулин. Жалпы сыйақы қоржыны 100 мың теңгені құрап отыр. Барлық қатысушы – 16 оқушыға ақшамен қоса, «Оян, қазақ» атты кітаптар сыйға тартылды.
Рудный қаласы
