Апатты мектеп атымен жоқ
Елімізде апатты жағдайда тұрған және үш ауысымды мектептерді жаңғырту үшін келесі жылы қазынадан 73 млрд теңге бөлінеді,- деп мәлімдеді ҚР Білім және ғылым министрі Аслан Сәрінжіпов.
Министрдің сөзінше, ҚР білім министрлігі бесжылдық жоспар әзірлепті. «Көптеген облыстардағы апатты мектептердің мәселесін үш жыл ішінде шешеміз. Жоғары демографиялық өсімі бар облыстарда аталмыш проблеманы шешу 5 жылды қажет етеді. Әрбір облыспен үш жылдық меморандум жасалды. Біз республикалық бюджет қаржысымен үлкен мектептерді салудамыз, ал облыстар жергілікті бюджеттің қаражатына мектеп салу жауапкершілігін алды», – деп атап өткен болатын А.Сәрінжіпов. Жалпы, республика бойынша 180 апатты мектеп тіркелген. Мәселен, Шығыс Қазақстан облысында – отыз алты, Қызылорда облысында – жиырма бес, Оңтүстік Қазақстан облысында –құлауға шақ тұрған 48 мектеп бар көрінеді.Ал,Қостанай облысында мұндай білім ошақтары мүлде жоқ. Тіпті, Тобыл өңірінде үш ауысыммен оқыту мәселесі ұмыт болғалы қашан.
-Бұл жағынан біздің облыс республика бойынша алдыңғы орында тұр. Яғни, облыста апатты мектеп атымен жоқ,-дейді облыстық білім департаменті басшысының орынбасары Асқар Әлмағамбет.
Айбек Кәдірұлы
