«Ақылды» қалалар, ауқымды жобалар
«Ақылды қала» жобасы аясында өңірде қандай жұмыстар атқарылып жатыр? Облыс әкімдігінде өткен кезекті жиында осы мәселе қаралды.
Қостанайды «ақылды» қалаға айналдыру бағытында 15 жоба қолға алынған. Оның сегізі бүгінге дейін іске қосылса, қалған жетеуі енді жүзеге асырылады. Бұл жұмысқа жергілікті бюджеттен 626 мың теңге бөлінген. Жобалар негізінен білім беру, денсаулық сақтау, қаланы басқару, қауіпсіздік, көлік, тұрғын үй-коммуналдық шаруашылығы салаларын қамтиды.
– Қаланың төрт саябағында жазда жұмыс істейтін тегін Wi-Fi орнатылды. «Қостанай-Су» кәсіпорнында «қашықтан бақылау жүйесін (SCADA)» қойылды. Бұл апаттарды азайтып, су шығынын кемітуге, құбырды қысымды бақылап отыруға мүмкіндік береді, – деп атап өтті қала әкімі Қайрат Ахметов.
Облыс орталығында іске қосылатын тағы бір тың жоба – «Әлеуметтік ID-карта». Оны халықтың әлеуметтік осал топтары пайдалана алады. Картаға қоғамдық көлікте жүру, балаларды мектептерде тамақтандыру және т.б. қызметтер кіргізіледі.
Қала әкімінің айтуынша, желтоқсан айында қоғамдық көліктерде электронды билет жүйесі енгізілмек. Сонымен бірге, «Қауіпсіз аула» жобасы шеңберінде бейнекамералар саны көбейтіледі. Енді аулалардағы ойын алаңдары мен қоқыс жәшіктері маңындағы тәртіпті учаскелік полиция пункттері қақ қақпай қадағалап отырады. Камераларды орнатуға бюджеттен 100 млн теңге бөлінген.
«Ақылды қала» жобасы аясында Лисаков, Жітіқара қалаларында да бірқатар жұмыстар жасалынған. Оны мінберде Ақпараттандыру, мемлекеттік қызметтер көрсету және архивтер басқармасы басшысы Азамат Кашиев баяндады.
– Лисаков қаласының әкімдігі цифрландыру бағытында мақсатты жұмыс жүргізіп келеді. Мұндағы «ақылды» бағдаршамдар орнатылып, Smart Lisakovsk мобильді қосымшасы іске қосылған. Жітіқарада 12 млн теңгеге 73 камера орнатылды. Яғни, қала көшелері 90% қамтылған. Бейнебақылау көмегімен қылмыстарды ашу көрсеткіші де жақсара түсті. Мысалы, 23 факт ашылып, 301 әкімшілік хаттама толтырылған, – деді А.Кашиев.
Облыс әкімі Архимед Мұхамбетов кеңес қорытындысында аудан, қала басшыларына «Smart City» жобасын жандандыруда тапсырды.
