Үздіктерге марапат
Науырзым ауданында “Жомарт жүрек” сыйлығының лауреаттары марапатталды.
Елбасы Нұрсұлтан Әбішұлы Назарбаевтың «Рухани жаңғыру: болашаққа бағдар» атты мақаласындағы болашаққа көзқарасы өзінің тереңдігімен әрқайсымызға ой салып, рухани болашақтың қалыптасуына, қоғамдық сананы жаңғыртуға бір кісідей ат салысуға міндеттеді. Патриотизм кіндік қаның тамған жеріңе, өскен ауылыңа, қалаң мен өңіріңе, яғни туған жеріңе деген сүйіспеншіліктен басталады. Туған жерге қызмет ету, патриот болу әр қазақтың міндеті. Осыған байланысты туған жерге деген патриотизм мен сүйіспеншілікті қалыптастыру, белгілі бір жетістіктерге жеткен Науырзым елінің тумаларын туған өлкесінің әлеуметтік-экономикалық дамуына тарту, жастарға еліне қызмет жасаған, әлі де жасап жүрген азаматтарымызды үлгі ретінде таныстыру, патриоттық тәрбие беру, ұрпақ сабақтастығын жалғастыру мақсатында лауреаттарды аудан әкімі Талғат Карбозов құттықтап, марапат иелеріне диплом мен естелік “Жомарт жүрек” статуеткасын табыстады.
Лауреттардың қатарында Науырзым ауданы Қожа ауылының тұрғыны, "Алимгазиев А" шаруа қожалығының басшысы Әлімғазиев Ақылбек бар. 1994 жылдан құрылып, қазіргі уақытқа дейін жемісті еңбек етіп келеді. Әлімғазиев Ақылбек ауданның әлеуметтік-экономикалық дамуына барынша үлес қосуда және алдыңғы қатарлы үзідк шаруашылықтардың бірі. Соңғы жылдары Науырзым орта мектебіне қазандықты ауыстыру (2008 жыл), ауылдық мәдениет үйін қайта құру (2005 жыл), музыкалық аппаратура сатып алу (2010 жыл), кіру жолын жөндеу (2018 жыл), өзге де іс-шараларға демеушілік етіп келеді. Тұрақты негізде шаруашылыққа тіркелген зейнеткерлерді тегін көмірмен және отынмен қамтамасыз етеді. Биыл өз ауылында жас мамандарға арналған отбасылық жатақхана салынуда. Құрылыс сомасы 40 млн. теңгені құрайды.
Сонымен қатар «Кенесары 2012» ЖШС 2019 жылдан бастап Науырзым жерінде жылқы шаруашылығымен айналыса бастады. Өз істерін бастаған жылдан бастап Қарамеңді ауылының тұрғындарына бір талай көмектері тиді. Өткен жылы Қарамеңді ауылының 22 көпбалалы және аз қамтылған отбасыларына азық-түлікпен көмек көрсетсе, биыл Наурыз мейрамы қарсаңында әрқайсысына 15 мың көлемінде 39 отбасыға азық-түлік қоржындарын табыс еткен болатын. Атлмыш шаруашылықтың атынан Мұратбек Қарымсақов марапатқа ие болды.
