Жар. Ана. Ұстаз
Елімізді өркениетке бастар жолдың бастауы – мектеп. Ал, жас буынның рухани дүниесінің асқақтығын әрқашан туған халқының алдында паш етіп, ел еңсесінің биік болуына, іргесінің сөгілмеуіне, ырысы шалқып ынтымағы арта түсуіне үлес қосып жүрген ол – ұстаздар қауымы. Осындай педагогикалық салада үздіксіз еңбек етіп, бүгінде алпыс-тың асқарына шықса да Рудный қаласындағы №15 орта мектебін-де ұстаздықтан қол үзбей келе жатқан математика пәнінің мұғалімі Әмина Шынтемірованың бағындырған биігі ұшан-теңіз. Астанадағы ҰБТ-жинақтарының сапалы шығуына қомақты үлес қосып, 11 сыныптарға арналған "Алгебралық есептер шығару техникасы" атты авторлық жұмысы облыс көлемінде таралса, 2000 жылдан бері "Атамұра" баспасынан қаншама тесттері жарық көрді десеңізші!. Адал еңбек әрқашан абыройға бөлейді емес пе. Өзгеде мадақталарымен қоса елеулі еңбегі еленіп, 2012 жылы Елбасымыз Н.Назарбаевтың "Алғыс хатына" да ие болды. Ең қызығы ұстаздық жол Әмина Кәмешқызының отбасынан бастау алған секілді. Кезінде, әкесі Кәмеш математик болса, одан үш апасы математик, екі сіңілісі бухгалтер мамандығын абыройлы меңгеріп жүр.
Нәзік жанның бәріне бұйыра бермейтін "әйел бақыты" деген қасиетті ұғым Әмина апайға да бұйырыпты. Осы бір жүрегі кең, мейірімді ана барды қанағат тұтып, отағасы Рашитпен бірге үш қыздан бес немере сүйіп, ғибратты өмір сүруде. Тұңғыш қыздары Әлия Қостанайда халықтық қызмет көрсету орталығында менеджер, Мәдинасы Алматыда сауда саласында, Ғалия Рудныйда қауіпсіздік орталығында оператор. Адам үлкейген сайын аңсағаны көбейіп, асығатыны азаяды екен. Бұл тұрғыда ұстаздың өз пікірі бар.
– Менің өмірімдегі отбасылық шарттарымның бірі шүкіршілік, қанағатшылдық пен шынайылық. Адамгершілік қасиеттер ізгілік пен сабыр иманнан бастау алар десем, сол қасиеттің топталып көрі-нетін жері ол – парасаттылық. Шәкірттерімді өз балаларымнан кем көрмедім. Қазіргі білім жаңарған тұста олар күн сайын "америка" ашуға бейім. Тоқырау дәуірінде өзіміз көп сөйлесек, қазір тек бағыт берушіміз. Жас кезімдегіден қазір арманым көп. Шәкіртім белесті бағындырса, әлі де пайдалы істер тындырсам деймін. Алла тағала денсаулық берсе, жас мамандарға үйретерім де көп – дейді ол ағынан жарыла.
Иә, жүрегіне иман ұялаған өнегелі өмір иесінің өмірнамасы ұжымға да үлгі.
Суретте: ұлағатты ұстаз Әмина Шынтемірова.
