Ертең сайлау өтеді
ҚР Президенті Қасым-Жомарт Тоқаевтың Жарлығымен Парламент Сенатына сайлау 12 тамызға тағайындалды, деп хабарлайды zakon.kz.
Сайлау 2020 жылдың қазан айында депутаттардың Конституциялық өкілеттік мерзімінің аяқталуына байланысты тағайындалады. Биыл қазан айында 2014 жылы сайланған 17 депутаттың өкілеттік мерзімі аяқталады.
ҚР Конституциясына сәйкес, Сенат депутаттары әр облыстан және республикалық маңызы бар қалалардан сайланады. Сайланған сенаторлардың жартысы үш жылда бір рет қайта сайланады.
Сайлау комиссияларының ұсынылған деректеріне сәйкес, бюллетеньдерге 46 кандидат енгізілген (тіркелгеннен кейін 12 үміткер кандидатураны алу туралы өтініш берді).
Шығыс Қазақстан облысында төрт кандидат, 10 өңірде үш кандидат бар: Ақмола, Атырау, Батыс Қазақстан, Қарағанды, Қостанай, Қызылорда, Павлодар облыстарында, Нұр-Сұлтан, Алматы және Шымкент қалаларында. Қалған өңірлерде екі кандидаттан.
Кандидаттардың арасында коммерциялық құрылымдардың, мемлекеттік ұйымдардың, кәсіпорындар мен мекемелердің жұмысшылары, мемлекеттік қызметшілер, қоғамдық ұйымдардың өкілдері мен қазіргі сенаторлар бар.
Республика бойынша таңдаушылар тізіміне 3 069 мәслихат депутаты енгізілген. Сайлау күні Орталық сайлау комиссиясы сайтында таңдаушылардың тіркелуін және дауыс берудің алдын ала қорытындыларын шығаруды онлайн-бақылау сервистері жұмыс істейтін болады, бұл сайлау процесінің ашықтығы мен жариялылығын қамтамасыз етеді.
Соңғы рет ҚР Парламенті Сенаты депутаттарының сайлауы 2014 жылдың 1 қазанында өткен. Онда 39 үміткер болған. 3 279 таңдаушының 3 236-ы немесе таңдаушылардың жалпы санының 98,69%-ы дауыс беруге қатысты. Сайлау бюллетеньдерінің жалпы санынан 12 сайлау бюллетені жарамсыз деп танылған.
