КЕЗЕКТІ РЕЙД ЖҮРГІЗІЛДІ
Қостанай қаласында мониторингтік топтың ұйымдастыруымен ірі сауда орталықтарына, дүкендер мен кафелерге кезекті рейд жүргізілді. Топ құрамында қалалық әкімдіктің, жергілікті полиция, ішкі саясат басқармасының, санитарлық қадағалау қызметкерлері мен БАҚ өкілдері бар. Рейд мақсаты – қызмет етуге рұқсат берілген сауда орындары мен бизнес нысандарындағы санитарлық талаптардың сақталуын қадағалау. Мониторингтік топ облыс орталығындағы Орталық әмбебап дүкен мен "MART", «Апельсин» сауда орталықтары, «Болашақ» сауда үйі мен «Гранат» мейрамханасына барды. Аталған нысандарда карантин ережелерін бұзу анықталды.
Сондай-ақ, ірі сауда орталықтарында бетпердесіз жүрген тұтынушыларға және оларға қызмет көрсеткен сауда орнының иелеріне ескерту жасалды. Карантинге байланысты бөлшек сауданың жұмыс режиміне таңғы сағат 08:00-ден кешкі 21.00-ге дейін рұқсат берілген болатын. Алайда, жабылатын уақытқа қарамастан жұмыс істеген «Болашақ» сауда үйі мен «West» дүкені әкімшілік жазаға тартылуы мүмкін.
– Біз қалалық әкімдік жанындағы мониторингтік топтың кезекті рейдін өткіздік. Кезекті рейд барысында қаламыздағы ірі сауда орталықтары, мейрамханалар, қоғамдық көліктер мен такси қызметтерінің карантин уақытындағы санитарлық талаптардың орындалуын қадағаладық. Рейд барысында бірқатар нысандарда сотқа берілетін құқық бұзушылықтар анықталды. Мониторингтік топтың міндеті – белгіленген алгоритм бойынша сауалнама, сурет, бейнетаспа түріндегі материалдар жинап, оларды рейд аяқталысымен сот қарауына жіберу. Талап бұзушыларға қатысты шешім шығарып, әкімшілік жаза белгілеу соттың құзырында, – дейді Қостанай қаласының бас мемлекеттік санитарлық дәрігері Алмат Байкенов.
Сонымен қатар, рейд барысында маршруттық автобустар мен таксилер де тексерілді. Тексеріс нәтижесінде автобус жүргізушілерінің барлығы дерлік қолғапсыз қызмет көрсетіп жатқаны анықталды. Тіпті, бетпердесіз отырған жолаушылар да кездесті. Жүргізушілерге қатаң ескерту берілді.
Рейд соңында топ өкілдері «Набережный» жағалауына да бас сұқты. Мониторингтік топты көре сала, түнгі сағат 22:00-ден кейін жұмыс істеп тұрған «Мохито» демалу кешені мен жағалаудағы дүңгіршектер дереу жұмысын тоқтатты.
Бұл нысандар алдағы уақытта да қатаң бақылауда болмақ. Және де жағалауда серуендеп жүрген азаматтарға ескерту жасалды.
Мониторингтік топтың рейдтік шаралары жалғасатын болады.
Суреттерді түсірген Бағдат АХМЕТБЕКОВ.
