Мектеп жаңа кейіпке енеді
Жангелдин ауданының Тәуіш ауылындағы Қаратүбек орта мектебін күрделі жөндеуден өткізу жұмыстары басталды.
Бұл мектептің іргетасы 1971 жылы қаланған. 230 орындық оқу ошағы сол уақыттан бері алғаш рет бастан-аяқ күрделі жөндеуден өткелі отыр. Жобаның жалпы құны – 184 153 000 теңге. Мердігер компания – Арқалық қаласының "Алюминстрой" ЖШС жұмысты 1 мамырда бастады. Жоспар бойынша, 4,5 айда аяқталуы тиіс. Бір жақсысы, құрылыс кезінде 21 жаңа жұмыс орны ашылды. Бұл табыс көзі аз Тәуіш ауылының тұрғындары үшін елеулі нәпақа болмақ.
Жалпы, биыл осы ауылдың құрылғанына 60 жыл толады. Сондықтан орта мектептің жөндеу жоспары жылдан-жылға көшіп келіп, осы жылы жаңа кейіпке енуі ауылдың меншікті мерекесіне жасалатын тарту болғалы отыр.
Анықтама үшін айта кетейік, Қаратүбек орта мектебі Торғай өңіріндегі тарихи беделді білім ошақтарының қатарында. Ол тұсында ауданның көптеген ауылдарынан балалар қатынап оқыған танымал екі мектептің бірі (біріншісі – аудан орталығындағы Ы.Алтынсарин атындағы ОМ) болған. Қаратүбектен Алашқа аты мәлім торғайлық көптеген ақын-жазушы, ғалым-профессорлар, мемлекет қайраткерлері, даңқты спортшылар түлеп ұшқан.
