Аймақта қандай хабар бар?
Егіс жұмыстары жалғасуда
Облыста. Өңірде көктемгі егіс жұмыстары басталды. Бүгінге дейін 180 мың гектар алқапқа тұқым сіңіріліп үлгерді. Олардың басым бөлігі – астық және майлы дақылдар, көкөністер. Биыл облыста 5,2 гектар жерге дән егу жоспарланған. Наурыз-сәуір айларында 51 мың тонна жанар-жағар май бөлінген.
Отыз мешіттен – отыз түп
Қостанай. Қазақстан мұсылмандары діни басқармасына 30 жыл толуына орай игі істер жүзеге асып жатыр. Облыстық орталық мешіт бастап, Рундый қаласының «Нұр», Меңдіқара аудандық «Зұлқарнайұлы Мұса қажы», Денисов ауданындағы «Жұма» мешітінің ұжымы абаттандыруды бастады. Жалпы, облыс бойынша 30 мешіт тарапынан мерейтойға сый ретінде 30 түптен 900 ағаш отырғызылады.
Жол жөндеуден өтеді
Рудный. Қаладан Денисов ауылына дейін жол-құрылыс жұмыстарын жүргізу жоспарлануда. Жолдың жалпы ұзындығы – 114 шақырым. Аталған учаскеде жер төсемінің құрылымы, жол қабатының сапалы төселуі жіті бақылауда ұсталады. Асфальтбетонды қоспаның және керннің сынамалары алынды. Ол сынақ зертханасында тексерілмек.
Ғылымға бетбұрыс
Арқалық. Ы.Алтынсарин атындағы Арқалық мемлекеттік институты ғылыми-техникалық қызмет субъектісін аккредиттеу туралы куәлік алды. Бұл ЖОО-ға ғылыми зерттеулерді гранттық және бағдарламалық-нысаналы қаржыландыру конкурстарына қатысуға мүмкіндік береді. Бұл бағытты еліміздің жоғары оқу орындарының кадрлық құрамы жүзеге асырады. Ғылымға бетбұрыстан АрқМПИ-да шет қалып отырған жоқ.
5 айға ерте бітпек
Меңдіқара. Меңдіқара-Ұзынағаш тас жолының 20 шақырымдық учаскесінде орташа жөндеу жұмысы жалғасуда. Мердігер – "Қостанай жолдары" ЖШС. Жұмыс былтыр шілдеде басталған. Биыл қазан айында аяқтау жоспарланған. Бірақ мұны мердігер ұйым 5 ай бұрын бітірмек.
2 жылға сотталды
Науырзым. 36 жастағы қылмыскер Өлеңді ауылы маңында "Нива" маркалы көлігімен жайылып жүрген 4 киікті қуа жөнеліп, екі киікті қағып өлтірген. Оны жақын маңнан өтіп бара жатқан аудан тұрғыны көрген. Ол полицияға хабарлаған. Көп ұзамай олар қолға түсті. Айыпкер қостанайлық екі жылға бас бостандығынан айырылды.
Ауыр қылмыс ашылды
Қарабалық. Белоглин ауылының тұрғыны 2014 жылдың қараша айынан бастап хабар-ошарсыз жоғалып кеткен. Ол кезде полицияға іздеу салынған адамның әпкесі арызданған. Осы жылдың 26 сәуірінде ауыл тұрғыны жақында сатып алған үйінен қапқа салынған әйел адамның дене бөлшектерін тауып алды. Бұл жоғалып кеткен әйелдің денесі болуы мүмкін. Сараптама жүргізілуде. 62 жастағы бұрын істі болған күдікті ұсталды.
