Бір топ бала Елбасының атынан сыйлық алды

by Qostanaı tańy · 24.12.2014

Қостанайлық 200 оқушы ҚР-ның Президенті атынан жаңа жылдық шырша мерекесіне қатысты. Аталмыш іс-шара облыс әкімі Н.Садуақасовтың қатысуымен қаладағы «Premium Palace» ресторанында өтті.

Елбасынын атынан ұйымдастырылатын Жаңа жылдық шырша меркесі жыл сайынғы әдемі дәстүрге айналған. Оған екінің бірі қатыса бермейді, таңдаулылар ғана ілігеді. Аталмыш мерекеге биыл облысымыздың түпкір-түпкірінен 250 бала келді. Бәрі де 9-15 жас аралығындағы оқушылар.

Аталмыш іс-шарада Елбасы Нұрсұлтан Назарбаев LED экран арқылы балаларды келе жатқан Жаңа жылмен құттықтады. Мемлекет басшысы өз сөзінде «Жаңа жыл балалар мен бүлдіршіндерге қуаныш сыйлайтын мереке. Мен сендерді, барша қазақстандықтарды келе жатқан Жаңа жыл мерекесімен құттықтаймын. Біздің ұлы Отанымыз жылдан жылға өркендеп өсуде. Қазір дүниежүзі Қазақ елін құрметтейді. Сендер осындай ерекше елде өсіп келе жатқан бақытты ұрпақсыңдар. Ата-аналарыңды қуанта беріңдер» деп балаларға оқуда озат болуға тілектестігін білдірді. Ұлт Көшбасшысының құттықтауынан соң облыс әкімі Н.Садуақасов та балаларға жылы лебізін білдірді.

-Тәуелсіздіктің 23 жылында еліміз биік белестерді бағындырды. Экономика дамып, құрылыс қарқын алды. Облыста жаңа мектептер мен кәсіпорындар пайдалануға берілді. Жуырда ғана біздің облыста Назарбаев зияткерлік мектебі ашылды. Соның бәрі сіздер үшін, жас ұрпақтың болашағы үшін жасалуда. Ата-ана, ұстаздарыңыздың мақтаныштары болыңыздар-деді облыс әкімі Нұралы Садуақасов.

Жаңа жылдық шырша мерекесінде балаларға Елбасының атынан ноутбук, кітап және басқа да сыйлықтар берілді. Сондай-ақ көршілес Ресейден келген акробаттар мен жергілікті цирк артистері өнер көрсетті.

Мынау суреттегі жеткіншектің аты-Ақжол Молдахметов. Ол Арқалық қаласынан келген. №6 мектептің оқушысы. Ақжол жаңа жылдық шырша мерекесіне спорттағы жетістіктері үшін шақырылыпты. Боксшы жігіт Елбасы Н.Ә.Назарбаевтың атынын сыйлық алғанына ерекше қуанды. Болашақта өзі де Президент болуды армандайды.