Ант қабылдау – перзенттік парыз
Қазақстан Республикасы Ішкі істер министрлігі Қостанай академия-сында күндізгі оқыту бөліміне қабылданған 1 курс тыңдаушыларының ант қабылдау салтанаты болып өтті. Академия тарихында ал-ғаш рет бірінші курсқа үш жүзге жуық тыңдаушы қабылданып отыр. Сол тыңдаушылардың қатарынан іріктелініп алынған үздік деген тоғыз тыңдаушы арадағы өзара ынтымақтастық пен келісімге сай көрші Ресей елінің ішкі істер министрлігіне қарасты жоғары оқу орындарының бірінде оқитын болады. Ал, енді іс-шараға келер болсақ, ең алдымен еліміздің Әнұранын тыңдаушылар біркісідей салтанатты түрде орындап шықты. Ант қабылдау салтанатына жиналған қонақтарды, ата-аналарды, офицерлер мен тыңдаушыларды оқу орнының бастығы полиция полковнигі М.Қызылов, Қостанай қалалық мәслихатының хатшысы Н.Халықов, ардагер Б.Болотских, ата-аналар С.Сафина, Н.Әбенова, 1 курс тыңдаушысы Р.Ілиясов құттықтап, өздерінің жылы лебіздерін айтып, игі тілектерін тіледі.
– Ант қабылдау дегеніңіз, бұл адал, әділ, сатылмайтын болу ғана емес, Отанға қызмет жасау, мемлекеттің мүддесін, ҚР Конституциясын, еліңді-жеріңді, айналаңды қоршаған азаматтар мен туған-туысыңды қорғау. Еліңнің, республикаңның нағыз азаматы болу. Бірінші курс тыңдаушысы үшін ант қабылдау салтанаты күні мәңгі есте қалары сөзсіз. Ол келешекте өз ісінің кәсіби офицері болып шығуы үшін заң мен тәртіпті сақтаумен қатар аса мәдениетті, білімді, еңбекқор, өмірдің небір жағдайы мен қиыншылық сәттерде сабырлылық сақтап, байыппен бәрін шешуі тиіс, – деді бізге өз әңгімесінде Қазақстан Республикасы Ішкі істер министрлігі Қостанай академиясының бастығы полиция полковнигі Мирлан Қызылов.
Салтанат аясында жиналғандарға академияның бір топ үздік спортшылары қоян-қолтық ұрыс әдістерінен көрініс қойды, барабаншы қыздар мен қысқа оқпанды винтовкашылар взводтары өздерінің өнерлерін көрсетті. Салтанат соңы шерумен аяқталды.
Гүлназым
САҒИТОВА
Суретте: ант қабылдау сәті.
