Қала қақпасы құлыптаулы ма?
Өткен аптаның соңына Рудный қаласының кіре берістерінде коронавирусқа байланысты алдын алу шараларын күшейту мақсатында блок-бекеттер өз жұмысын бастады. Оларды орнатудағы негізгі мақсат – халықты ақпараттандыру, азаматтардың қозғалысын бақылау және жолаушылардың дене қызуын өлшеу.
![22 (2)](https://old.kostanaytany.kz/wp-content/uploads/2020/04/22-2.jpg)
Бекеттер 3 жерге: Қостанай, Лисаков және Қашар бағытындағы тасжолға қойылды. Әрбір пунктте медицина, полиция өкілдерімен мемлекеттік қызметкерлердің қатысуымен тәулік бойы кезекшілік ұйымдастырылған.
![11 (2)](https://old.kostanaytany.kz/wp-content/uploads/2020/04/11-2.jpg)
–Алғашқы 18 сағаттың ішінде біздің бекеттен 400-ге тарта автокөлік өтті. Олардың 26-сы – жеке шаруалар мен қонаққа баруға шыққандар кері қайтарылды. Жалпы облыс бойынша жүріп-тұруға шектеу жоқ. Қала қақпасы құлыптаулы емес. Алайда, тұрғындарды түсіністік танытуға және аса қажеттілік болмаса қаладан шықпауға шақырамын, – дейді №11 блок-бекетінің аға кезекшісі Жеңіс Қойбағаров.
![33](https://old.kostanaytany.kz/wp-content/uploads/2020/04/33.jpg)
Айта кетейік, Рудный мен Қашардың арасында қатынайтын «ССКӨБ» АҚ қызметтік көліктері үшін «жасыл дәліз» ұйымдастырылған. Өйткені, кеншілердің дене қызуын кәсіпорынның ақ халаттылары жұмысқа кірісерде күнделікті тексереді.
Қуаныш Есқабыл