Газет жүлдесі иесін тапты

Облыстық «Қостанай таңы» газеті көптеген іс-шараларға қол ұшын созып жүр. Мәселен, басылымның бастамасымен облыс орталығында «Домбыра-думан», жыр мүшәйрәсі, қайырымдылық концерттері ұйымдастырылса, бұл жолы  редакция ұжымы бокстан өткен облыстық чемпионатқа арнайы жүлде тікті. Естеріңізде болса, өткен аптада Қостанайда КСРО спорт шебері Виталий Левшинді еске алуға арналған біріншілік туралы жазғанбыз.

                   Үш күнге ұласқан дүбірлі додаға барлығы отызға жуық былғары қолғап шебері қатысты. Шаршы алаң шеберлері сегіз салмақ дәрежесі бойынға сынға түскенін айта кетейік.

                  -Жалпы, елімізде Қостанай боксының алар орны бөлек. Өздеріңізге мәлім, біздің өңірден Сеул олимпиадасының күміс жүлдегері Александр Мирошниченко, Эрик Хакимов, Рио-де-Жанейро және Лондон олимпиадасының қола жүлдегері Иван Дычко, Антон Пинчук және Жан Кособуцкий тәрізді әлем таныған былғары қолғап шеберлері шыққан. Бүгінде олардың ізін басқан жас спортшыларымыз аз емес. Мына өтіп жатқан біріншілік алда Ақтау қаласында қтетін Қазақстан чемпионатына іріктеуге мүмкіндік беріп отыр. Осы жарыста суырылып, алға озғандар облыс құрама командасының сапына ілігеді, – дейді жарыстың бас төрешісі Өзбек Қазин.

                  

Сонымен, Левшин турнирінің финалдық кезеңіне сегіз жұп жолдама алды. Алдымен шаршы алаңға 52 келі салмақта қостанайлық Олег Гарипов пен жітіқаралық Радион Марущенко шықты. Тартысты кездесу ҚР спорт шебері О.Гариповтың еншісіне бұйырды. 57 келіде Қостанай ауданының өкілі Айдос Арапов пен рудныйлық Ердос Шораев қолғап түйістірген. Бұл жекпе-жек те өте шиеленісті өтті. Дегенмен, ұпай басымдылығымен спорт шебері А.Арапов жеңіске жетті. Ердос жүлделі екінші орынды иеленді. Айтпақшы, «Қостанай таңы» газеті тіккен «Жеңіске деген жігері үшін» жүлдесі дәл осы Ердос Шораевқа бұйырды.

                  

-Ердос өте шапшаң боксшы. Қимылдары ширақ. Қарсыласының осал тұсын дөп баса біледі. Болашақта Ердостанатақты спортшы шығарына сенемін,-дейді Виталий Левшин шәкірттерінің бірі, белгілі спорт маманы Дәмер Қалқаев.

                   69 келі салмақта ринг төріне көтерілген жұптың арасында қостанайлық Әлихан Жақыпов жеңіске жетті. Әлихан да өзінің әпжіл соққыларымен көптің есінде қалғаны сөзсіз. Ол барлық кездесуінде айқын басымдылықпен жеңіске жетті.

                    -Финалда мен рудныйлық Нұрбол Бердімұратовпен жұдырықтастым. Ол өте мықты боксшы. Әсіресе, тактика жағынан да, физикалық жағынан да сауатты дайындалған.  Маған бұл кездесу оңайға түскен жоқ. Тек, бапкерлерімнің айтқанын ақылын тыңдап, сол арқылы жеңіске жеттім,-дейді Әлихан. Мен бұған дейін екі кездесу өткіздім. Оның біреуін нокаутпен жеңдім.

                   Әлихан боксқа бес жасында келген. Содан бері талай рет халықаралық, республикалық біріншіліктердің жүлдесін еншілеген. Виталий Левшин турнирінің чемпионы атанған қостанайлық боксшы енді облыс құрама командасы сапында ел  біріншілігіне аттанады.  

 

   Әлібек ЫБЫРАЙ

Суреттерді түсірген Бағдат Ахметбеков