Мақсат – білікті маман даярлау

Қазіргі таңдағы стратегиялық міндеттердің бірі – еңбек нарығындағы сұраныстарға сай келетін мамандарды даярлау мәселесін шешу. 2017-2021 жылдарға шақталып құрылған "Еңбек" бағдарламасы – аталмыш мәселеден шығар жол нұсқайтын тетіктердің бірі. Ал осы тетікті облыстық Білім басқармасы қаншалықты тиімді пайдаланып жатыр? Бұл тұрғысында басқарма басшысы мәслихат сессиясында баяндап берді.

Негізінде, Білім басқармасы аталмыш бағдарламаның 1 және 4-ші бағыттарына жауапты. Нақтылай айтқанда, 1-бағыт – бағдарлама қатысушыларын техникалық және кәсіптік біліммен қамту. Ал 4-бағыттың көздейтіні – "Жастар – ел тірегі" ұлттық жобасының кешендік шараларын іске асыру, "Жас маман" жобасы аясында білікті кадрлар дайындау.

"Соңғы үш жылда техникалық және кәсіптік білімі бар мамандар даярлауға 2,7 млрд теңге жұмсалса, тек 2020 жылы бұл мақсатқа 2,2 млрд теңге бөлінді, – деді басқарма басшысы Василий Цымбалюк. – Бұл бағытты жүзеге асыруға өңірдегі 35 колледж қатыстырылып отыр. Жалпы, "Еңбек" бағдарламасы бойынша 2 763 студен оқып жатыр. Оның ішінде, әр екіншісі – тұрмысы төмен отбасылардан. Олардың оқу ақысын мемлекет төлейді, бір реттік ыстық тамақпен, шәкіртақымен және демалыс кезеңіндегі жолақымен қамту қарастырылған".

Өткен жылдың 1 қыркүйегінен бастап орта топтағы мамандарды даярлау қолға алынған. Осы жылы 125 адам 5 мамандық бойынша білі алуда. Былтыр алғашқы 21 студен оқуын аяқтап шығып, олардың 18-і жұмысқа тұрған. Биылғы оқу жылы 950 студент қабылданды.

 

Суреттерді түсірген Бағдат Ахметбеков