Дәрігерлер баспаналы болды
Бүгінде өңірде дәрігерлер мен медбикелерді әлеуметтік қолдау, олардың кәсіби тұрғыда өсуіне, тұрмыстық жағдайының жақсаруына ерекше қолдау көрсетілуде. Әсіресе, жас мамандарға деген жергілікті биліктің қамқорлығы ерекше екенін айта кеткен жөн. Оларды көтермеақымен ғана емес, тұрғын үймен қамтамасыз ету бойынша да жұмыстар жүргізіліп жатыр. Соның бір жарқын дәлелі – бүгін қостанайлық бір топ дәрігер алғаш рет “Қазақстандық ипотекалық компаниясы” АҚ арқылы қолжетімді баспанаға қол жеткізді. Оларға пәтер кілттерін облыс әкімі А.Мұхамбетов табыс етті.
Өңір басшысы баспаналы болған дәрігерлерді қоныстойымен құттықтап, алдағы уақытта мұндай қолжетімді баспанамен мұғалімдердің де қамтылатынын айтып өтті.
-Құрметті қостанайлықтар, қала қонақтары! Мен сіздермен бүгін осындай қуанышты шарада жүздескеніме өте қуаныштымын. Өздеріңізге белгілі, Елбасымыз өткен жылы “Нұр Отан” партиясының XVII съезінде халықты баспанамен қамтамасыз ету туралы тапсырма берген болатын. Бүгін осы тапсырманы орындау аясында біз дәрігерлерге баспана кілтін табыстап жатырмыз. Ең бастысы, бұл баспаналарды қаржыландыруға көмек қолын созған “Қазақстанның ипотекалық компаниясы” акционерлік қоғамының басшылығына айтар алғысымыз шексіз. Өткен жылы Қостанай облысының әкімдігі мен аталған ұйым арасында “Нұрлы жер” тұрғын үй құрылысы мемлекеттік бағдарламасына қатысушыларға сатып алу құқығымен жалға берілетін тұрғын үйді сату, атап айтқанда 3 жыл ішінде Қостанай облысының денсаулық сақтау қызметкерлері үшін 350 пәтер сатып алу туралы келісім жасалған болатын. Өткен жылы 54 пәтер сатып алынды, соның 25-і бүгін пәтер кілттерін алып жатыр. Көп ұзамай қалғаны да қолжеткізетін болады. Жалпы, мұндай бағдарлама тек Алматы, Нұрсұлтан, Маңғыстау, Қарағанды және Қостанай облыстарында ғана бар. Басқа өңірлерде мұндай бағдарламалар әзірге жоқ. Ал, біз бірінші болып осы бағдарламаны жүзеге асырып жатырмыз. Барлық дәрігерлерді қоныстойымен құттықтаймын, шаңырақтарыңыз шаттықққа тола берсін, – деді облыс әкімі А.Мұхамбетов.
Қоныс тойын тойлаушылардың бірі – Меруерт Зекенбаева. Ол қаламыздағы №3 емханада онколог болып істейді. Семей медициналық университетін тәмамдаған жас маман жолдамамен келген көрінеді. Жарты жылдың ішінде қолжетімді баспанаға қол жеткізген оның қуанышында шек жоқ.
"Біз сияқты жас отбасылар үшін өте тиімді. Себебі, бастапқы жарнасыз, жылдық 3 пайызбен 20 жылға алып жатырмыз. Әйтпесе, алғашқы жарнаны жинау да оңай емес. Өте қуаныштымыз", – дейді жас маман.
Қостанай қалалық №3 емхана бас дәрігерінің орынбасары Қарлығаш Әленованың сөзінше, өткен жылы емханаға 27 дәрігер келсе, соның 23-і жас мамандар екен. Осы жас мамандардың тоғызын пәтермен қамтамасыз ету жоспарланған көрінеді.
-Бүгін соның бесеуі баспанаға қол жеткізіп жатыр, ал төртеуі наурыз айында пәтер алады. Жалпы, біздің емхана бойынша әлі 17 дәрігер баспанаға зәру, дегенмен жыл аяғына дейін олардың бәрі пәтермен қамтамасыз етіледі деген үміттеміз. Дәрігерлерді тарту мақсатында көптеген жұмыстар атқырылып жатыр. Биыл қатарымыз тағы бір маманмен толықты. Сондай-ақ, жақында электронды еңбек биржасы арқылы да кардиолог және балалар психиатры келеді. Айта кетер жәйт, мамандарды тарту мақсатында қазір бас дәрігеріміз Ақтөбе облысына бос жұмыс орындары жәрмеңкесіне кетті. Сондықтан, біздің емханада кадр мәселесі айтарлықтай шешілген әрі оларды пәтермен, бір реттік көтермеақымен қамтамасыз ету жағы да жақсы жолға қойылған, – дейді бас дәрігердің орынбасары Қ.Әленова.
Суреттерді түсірген Бердіболат Көркембаев
