Баспана иесі – көп балалы ана
Қазақстан мұсылмандары діни басқармасы жанындағы «Зекет» қайырымдылық қорының «Ел үлесі — пәтерге» акциясы аясында елдегі баспанаға мұқтаж жетім балаларға, көп балалы отбасыларға көмек көрсетіліп жатыр. ҚМДБ Бас мүфтиі Серікбай қажы Оразұлының тікелей тапсырмасымен басталған осы ізгі жоба Жангелдин ауданының Торғай ауылында жалғасын тапты. 
Бұл жолы алты баланың анасы Мадина Қонысоваға 174-ші үйдің кілті табыс етілді. Баспана кілтін Арқалық қаласындағы «Мухтасиб Әлмұхаммед» мешітінің Бас имамы Дархан Исламбекұлы табыстады. Үй иелеріне аудан тұрғындары әрі мешіт жамағаты кілем тарту етті. Аудандық ардагерлер кеңесінің төрағасы Қарсақбай Бірмағанбетов сөз сөйлеп, қуаныш иелерін құттықтады. 
Айта кеткен жөн, бұл акция мешітке келуші жамағаттар мен қайырымды жандардың үлес қосуы арқасында жүзеге асуда. Осы уақытқа дейін Қазақстан бойынша екі жүзге жуық үй өз иелерін тапқан.
