Рудныйда – жаңа имам
Қазақстан мұсылмандары діни басқармасының төрағасы, Бас мүфти Серікбай қажы Ораз хазреттің бұйрығымен Рудный қаласындағы «Нұр» мешітінің бас имамы болып Бектұрсын Уәлиев тағайындалды. Жаңа басшыны жамағатқа облыстық «Марал ишан» мешітінің наиб имамы Дархан Сыздықов таныстырды.
Бектұрсын Торғайбайұлы дін саласында 1999 жылдан бері қызмет етіп келеді. Осыған дейін 7 жыл бойы Арқалық қалалық «Мухтасиб Әлмұхаммед» мешітінде бас имам болған. 12 жылдай қазіргі Бейімбет Майлин ауданындағы діни ахуалды да жақсартып, мұсылмандардың діни сауаттылығын арттыру жолында біршама еңбек сіңірген. Жиналған қауымның атынан Ғабдолла қажы Ахметжанов жаңа имамның жұмысына табыс тілеп, ыстық лебізін білдірді.
Айта кетейік, кеншілер қаласында төрт жыл қызмет еткен Азамат Мұрзақанов Тобыл қаласындағы «Маңдай батыр» мешітіне наиб имам болып тағайындалды.
Қуаныш ЕСҚАБЫЛ
