ҚАЗАҚ ТЕАТРЫНДА – ЖАҢА ҚОЙЫЛЫМ

Ілияс Омаров атындағы қазақ драма театрында жаңа қойылымның премьерасы өтті. Қырғыз жазушысы Мар Байжиевтің «Дуэль» («Судағы із…») драмасының желісімен қойылған жаңа пьесаны сахналаушы – жас режиссер Дос Құбаш.

Драмаға ауыр тағдыр арқалаған үш адамның теңіз жағасында табысуы арқылы өрбитін қайшылыққа толы оқиғалар  арқау болған. Режиссер «Адам өмірінің мәні неде?» – деген мәңгілік сауалға  осы үш кейіпкердің адами болмысы мен олардың арасында туындайтын  қарама-қайшы сезімдер арқылы жауап табуға ұмтылады.

 

Сахналық шығарманың бас кейіпкері – Нәзи есімді қыз (Диана Тұрсынова). Албырт шағында сүйген адамының алдап-арбауына шырмалған бақытсыз қыз бүкіл еркек кіндіктіден түңілген. Теңіз жағасындағы шағын дүкенде сатушы болып жұмыс істейтін Нәзидің ендігі өмірі  есерсоқ Ескендірге (Асылан Кенжетай) тәуелді. Өзімшіл әрі мейірімсіз  Ескендір –  өзі өскен қатігез орта мен бақытсыз балалық шақтың жемісі.

 

Таяу маңдағы шипажайға емделуге келген әскери теңізші Әзизбен болған кездейсоқ кездесу  ізгілік атаулыдан біржола күдер үзген Нәзидің сүреңсіз өміріне сәуле түсіріп, қыздың күйрек дүниетанымының астаң-кестеңін шығарады. 

Сүйіспеншілік пен қатігездік, ерлік пен қорқаулық, адалдық пен опасыздық, өмір мен өлім тартысқан драмалық шығарма көрерменді бей-жай қалдырмайды. Ойландырады. Күнделікті күйбің тіршіліктің көлеңкесінде қалып қоя беретін адами асыл қасиеттер туралы пәлсапалық ойларға жетелейді.

– Бұл драманы алғаш Алматыда оқып жүргенде Жасөспірім көрермендерге арналған театрда көрдім.  Өзімше сахналап көру туралы арман сол кезде-ақ пайда болды. Түпнұсқаны біраз қысқартып, көрерменді жалықтырып алмауға тырыстым. Бұл туынды өлмейтін, өшпейтін махаббат тықырыбына арналған, – дейді ескі де жаңа драманың  қоюшы режиссері Дос Құбаш.

 

Нұрқанат Құлабаев

Суретті түсірген Бердіболат Көркембаев.