Жүкті әйел құтқарылды

Әулиекөл ауылының № 15 Өрт сөндіру бөлімінің байланыс пультіне Новоселов ауылдық округінің әкімінен Соснов ауылында тұратын аяғы ауыр әйелді эвакуациялау үшін көмек қажет екендігі туралы хабарлама келіп түскен. Толғақ қысқан әйелді Әулиекөл аудандық ауруханасына жеткізу мүмкін болмай, жеңіл көліктің қар басқан жолда қалып қойғаны хабарланған.

Шақыртылған жерге жүкті әйелді құтқару үшін Әулиекөл ауданы ТЖБ 4 қызметкері және Әулиекөл ауылының № 15 ӨСБ, сондай-ақ Новоселов ауылдық округінің әкімі шақыртылды.
Жол талғамайтын "Газ-66" (Кунг) көлігі бір сағаттың айналасында Соснов ауылына жетті. Одан кейін ауылдан 2 шақырым жерде қар құрсауында қалған "Ваз-2114" маркалы автокөлігі табылды. Бұл көлікте аяғы ауыр әйел, оның жұбайы және жергілікті мектептің медбикесі болған. Әулиекөл-Москалев тас жолында батып қалған көлік жолаушыларына көмек көрсетіліп, аяғы ауыр әйел Әулиекөл ауылына жеткізіліп, медициналық жедел жәрдем қызметіне тапсырылды.

Облыстық ТЖД баспасөз қызметінің мәліметтері бойынша