Үздік жобалар анықталмақ

"Тобыл" ӘКК облыс әкімдігінің  қолдауымен "Kostanai EXPO 2014" аймақтық байқау жариялады. Оның қорытындысы алдағы қараша айында "Болашақ энергиясы" жобаларының көрмесіне ұласпақ.

– Байқаудың жүлде қоры – 1,5 млн. теңге, – дейді басқарма төрағасының орынбасары, "Тобыл" ӘКК" АҚ инновацияларын қолдау және инвестиция тарту  орталығының директоры Рамазан Тлеоф, – Бұл байқау үш жылдан кейін Астанада өтетін халық-аралық "ЭКСПО – 2017" көрме-сінің мәртебесі мен танымалдылығын арттыру мақсатында ұйымдастырылып отыр. Сондай-ақ, біз, байқау мен көрмені өткізуге жауапты есебінде, халықтың  "жасыл" технологияларды пайдалану, жаңа идеялар мен жобаларды құрудың ғылыми және интелектуалдық  мүмкіндіктері туралы дүниетанымын кеңейтуді көздейміз. Байқау қорытындысы бойынша өңірлердегі үздік жобалар іріктеліп, ЭКСПО – 2017-ге қатысуға ұсынылатын болады.

Байқауға  жіберілген жобалар туралы өтініштер  мына бағыттар бойынша  қаралады: жарықтың жаңартылған және баламалы көздері; энергосақтау және жарықтың тиімділігі; экологиялық қауіпсіздік және электр қорын сақтау; "жасыл технология".

Байқауға облыс аумағында тұратын жеке тұлғалармен қатар түрлі меншік иелері қатыса алады. Қостанай облысының аумағында инновацииялық жобаларды жүзеге асыруға ниетті  өзге облыс өкілдерінің де байқауға өтініш тапсыруына болады.

Байқау комиссиясының назарына жас интелектуалдардың жобалары ұсынылып, олар үшін  жеке "Колледждер мен мектеп оқушыларының үздік инновация-лық идеялары мен жобалары" аталымы тағайындалады. Қал-ған қатысушылар " Үздік ғылыми-техникалық  өңдеу" және "Үздік бизнес жоба" аталымдары бойынша жүлдеге таласады.

Естеріңізге салайық, барлық өтініштер үстіміздегі жылдың 15 қыркүйегінен 15 қарашасына дейін қабылданады.

Айбек

       КӘДІРҰЛЫ