Мектептегі мереке

by Qostanaı tańy · 23.12.2019

Қалалық балалар шығармашылық мектебі базасында дәстүрге айналған зияткерлік, спорттық және шығармашылық конкурстарда жеңімпаз атанған жалпы саны 100-ден астам оқушы қатысқан жаңажылдық кеш өтті. Мақсат – дарынды балалар мен танымдық қызығушылық дамытуды қолдау, қалалық мектеп оқушыларын ынталандыру.

Аталмыш шараға қала әкімі Қайрат Ахметов қатысып, алдағы жылы болатын айтулы оқиғаларға тоқталып, қатысушыларға жылы лебізін білдірді.

–Биыл Жастар жылы Қостанай қаласының өскелең ұрпағының білім, ғылым және спорттағы жоғарғы нәтижелерімен есте қалмақ. Оқушыларда алдында тұрған жаңа идеялар мен жобалардың іске асуы үшін үлкен мүмкіндіктер бар. Баршаңызды келе жатқан Жаңа жыл мерекесімен құттықтаймын. Барлықтарыңа зор денсаулық, бақыт, отбасыларыңызға амандық тілеймін, – деді қала әкімі Қ. Ахметов.

Шара барысында оқуда озат атанып, түрлі додаларда облыстың даңқын көтерген оқушылар марапатқа ие болды. Марапаттау рәсімінде 2019 жылы қаламызды республикалық және халықаралық деңгейлерде қорғаған 10 мектеп көшбасшыларына Алғыс хат және «Үміт» статуэткасы берілді. Сонымен қатар, әл-Фарабидің 1150 жылдығы мен Абай Құнанбаевтың 175 жылдық мерейтойын мерекелеуге арналған қалалық эссе конкурсының 6 жеңімпазы мен жүлдегерлеріне әкімнің грамотасы табысталды. Сондай-ақ, шара қатысушыларына құттықтау хаттар, жаңа жылдық ескерткіш сыйлықтар табыс етілді.