Ұлы ұстаздың елінде “Қостанай таңы” газетінің күндері Алтынсарин ауданында өтті

Аудан әкімі Б.Ахметов Қостанай таңын бала кезінен оқып келеді

Биылғы жылы облыстағы жалғыз қазақ газеті, қолыңызда тұрған "Қостанай таңы" қызметкерлері облыс көлеміндегі аудан, қалаларды аралап, оқырмандармен жүздесуді бастаған еді. Газет редакторы Жанұзақ Аязбеков бастаған редакция алқасы Қостанай, Таран ауданындары, Рудный, Лисаков қалаларынан басталған кездесу кештері Аманкелді, Жанкелдин, Арқалық сияқты елді-мекендерде жалғасын тауып жатты. Кездесуде салиқалы ой, салмақты пікірлер айтылып, олар газет бетінде жарық көрді.

Осы дәстүр жалғасын тауып, шығармашыл топ қала іргесінде жатқан Алтынсарин ауданында болды. Ы.Алтынсарин, М.Хакімжанова, О.Шипин сынды қазақтың біртуар перзенттерін дүниеге әкелген қасиетті топырақ – Алтынсарин ауданында "Қостанай таңы" газетінің күндері осылай бастау алды. Аталған аудан жұртшылығының дені орыс тілді.  Қазақ тіліндегі басылымға жазылу

Ақсақал Ж.Сейітов тұрақты оқырман

көрсеткіші бұл ауданда бар болғаны 150 дана екен. Дей тұрғанмен аудандық мәдениет үйіне жиналған оқырман қалың болмаса да әңгіме емін-жарқын жағдайда өрбіді. Шүкір, мұнда өз оқырмандарымыз бен жанашырларымыз баршылық екен. Мұны аудан әкімі Батырбек Ахметовтің сөзінен-ақ сезіндік.

– Ауданда "Қостанай таңының" күндері өтуде. Бұл газет 92 жылдан бері об-лыстың барлық өмірін газет бетінен көрсетіп келе жатқан жалғыз қазақ тілді басылым. Осы басылымды кішкентайымнан оқып өскен жанның бірі мен едім. Ел ішіндегі жылт еткен жаңалықтарды газет бетіне шығарып, оқырмандарды құлағдар ететін басылым-ға жазылуды ортақ мақсат санаймыз. Халықтың санына қарай ауданда жазылу  азырақ. Жылына 150 дана ғана жаздырып алады екенбіз. Ал біз сияқты өзге аудандар жыл сайын 1500-2000 дана жаздырып келеді. Сондықтан, жазылу    науқанын жақсарту біздің міндетіміз. Алтынсарин ауданын таныта түсетін меншікті тілшіміздің   болғанын қалар едік.

Б. Жүзбай газет жанашыры

Сол себептен де аудан өмірі газет бетінен толығымен көрсетілмей келеді, – деді аудан әкімі.

Қазір келесі жылдың баспасөзіне жазылу нау-қанының нағыз қызған шағы. Бұқарамен, әсіресе газет оқырмандарымен жақын байланыс орнатудың бірден бір жолы елмен тікелей жүздесу. Себебі, ауыл адамдарының қашанда айтары бар. Мұндай кештер күнде бола бермейтіні белгілі. Кездесу барысында газеттің бас редакторы Жанұзақ Аязбеков оқырмандарды газет редакциясының бүгінгі тыныс-тіршілігімен, болашақтағы жоспары туралы хабардар қылды.

Редакция алқасымен бірге ауданға белгілі ақын Серікбай Оспанов, жазушы, жерлесіміз Тұрсынбек Токин, әнші Манапбек Қадіров та барған еді. Олар да өз ойларын ортаға салып, әндерін арнай отырды.

"Есімді білгеннен өлең жазып келеді екенмін, – деп сөзін бастады Серікбай Оспанов. – "Қостанай таңын" бала кезімнен оқимын. 50 жыл бойы осы газет жансерігіме айналып келеді. Дегенмен орыс тілді басылымдармен салыстырғанда қазақ газетінің таралымы әлдеқайда төмен екенін көремін. Намысқа тырысу керек, ағайын.

Ағайын-туыс, досқа айтарым, 

Жаздырып алыңыз "Қостанай таңын"!  – деп ұран тастады ақын ағамыз.

Жас тілші куәлігін алғанда

Әрине, газет қашанда оқырманымен бағалы. Осыны ескергендіктен ел ішін аралап, оқырманмен арада байланыс орнатып жатырмыз.  Қазіргі оқырманның көзі ашық, көкірегі ояу. Басылым бетінен оқығанына сын айтып, пікір қосып отыратын көпшілік бұл жолы аз да болса ұсыныстары мен талап-тiлектерін, мұң-мұқтажын айтып қалуға тырысты. Жалпы қай ауданға барсақ та, халықтың облыстағы жалғыз қазақ газетіне деген ықылас-пейiлi, тілегі ерекше екенiн аңғарғандаймыз. Қай-қайсысы болмасын шығармашылық табыс тiлеп, жүрекжарды лебiздерiн жеткiзiп, ағынан ақтарылып жатады. Бұл жолы да көпшіліктің ішінен суырылып, алғаш сөз алған ақсақал Жандарбек Сейітов болды. Аудандық ардагерлер кеңесінің төрағасы басылымның бүгінгі бейнесіне ризашылығын білдірді. 

– "Қостанай таңы" – талайды көрген газет. Бүгінде өркендеп келеді. Өзім үнемі жаздырып аламын. Әсіресе "Бас редактор әлемін" оқып, риза болып отырамын.  Менің айтарым, газет бетінде қарапайым еңбек адамдары туралы көбірек жазылса деймін. Және де ауыл жастарын көрсетіп отырса, тіптен жарасып кетер еді деген ойдамын. Бүгінде газет сапалы, мазмұны да жақсы, – деді ақсақал.

Аудандық мәдениет үйінің қызметкері Біржан Жүзбай екі сауал тастады:

– Алтынсарин ауданынан сіздерге үнемі жазып отыратын меншікті тілші болады ма? Және газет бетінде жазылып жатқан сыннан қорытынды бар ма? Қорытынды болса, газетке жазып, оқырман біліп отырса.

Бас редактор екеуіне де жауап берді.

– Ауданнан меншікті тілші алуға қажеттілік жоқ. Себебі, аудан қалаға жақын. Газеттің тілшілері қандай да бір шараға іссапармен келіп, жазып кете алады. Келешекте ауданда жазылу данасы артып жатса, сіздерден ақпарат та көбейеді. Ал сыннан шыққан қорытындыға келер болсақ, мұндай біздің тәжірибемізде бар. Келешекте де жалғасады, сыннан шыққан қорытындымен оқырманды құлағдар етіп отырамыз.

Газет оқырманымен бағалы

Қалыптасқан дәстүр бойынша "Қостанай таңы" газетінің жас тілшілері анықталып, жанашырлар клубы құрылды. Қолдарына "Жас тілші" куәлігін алған жастардың қуанышында шек жоқ. Мұндай бақыт Арманбек Әбділманап пен Талғат Қапиятовқа бұйырды. Көгілдір түсті куәілікті иеленген шығармашылыққа талпынған жастар енді газеттің бір жанашыры, жас тілшісі. Ал жанашырлар клубының қатарында Түркістан Қалелбекұлы, Жандарбек Сейітов, Біржан Жүзбай сынды азаматтар бар. Олар келешекте редак-циямен тығыз байланыс орнатып, газеттің таралуына елеулі үлестерін қосады деген сенімдеміз. Қолына қалам алып, хат жазған оқырман хаты ешқашан елеусіз қалмайтыны белгілі. Оны байланыстың кез-келген түрімен жолдауға да болады. Өзіне ыңғайлы болса хатпен, немесе электронды пошта, факспен газет редакциясына жіберсе, тілшілер қорытып, газетке шығарып жатады. Оқырман белсенді болса, газет те түрлене түсері белгілі. Қазақ газетінің өркендеуіне жол ашып, жазылуға үлес қосыңыз, ағайын!

Айтолқын

        АЙҚАДАМОВА