Майлинге лайық мектеп
Бүгін Тобыл өңірінің жұртшылығы үшін «ақ түйені қарны жарылған күн». Жазда ел Президенті Қасым-Жомарт Тоқаевтың Жарлығымен Таран ауданына қазақ әдебиетінің біртуары, даңқты жерлесіміз Бейімбет Майлинның есімі берілсе, енді міне, Рудныйдағы №7 мектеп-гимназиясы да Би-ағаның атын иеленіп отыр. Тарихи сәтке орай қарашаңырақта бірнеше тағылымды іс-шаралар болып өтті.
Алдымен алыстан арнайы келген қонақтар, жазушының жиен немересі Дәметер Сейітжанова, Бейімбет Майлин атындағы қордың негізін қалаушы, әрі оның шөбересі Салтанат Мұстафина, көсемсөзші-журналист Ақылбек Шаяхмет, ақын, Ыбырайтанушы ғалым Серікбай Оспанұлы мектеп қабырғасына орнатылған ескерткіш тақтаның ашылу салтанатына қатысты. Онда кіріспе сөз сөйлеген қала әкімінің орынбасары Елена Скаредина он жылға жуық тарихы бар алдыңғы қатарлы, әрі инновациялық білім ордасы Бейімбет Майлин атауына әбден лайық екендігін айтып, мектеп ұжымына шығармашылық шабыт пен биік жетістіктер тіледі.
Айта кетейік, Қостанай облысында бұған дейін тек Арқалық қаласы мен Бейімбет Майлин ауданында Би-аға атында мектептер болды. Енді жерлесіміздің 125 жылдығы қарсаңында бұл тізім толыға түсті. Сонымен қатар, биыл кеншілер қаласының жеке тұрғын үйлер аумағында орналасқан Майлин көшесіне бұрын-соңды болмаған тас жол төселгендігі қуантады.
Шарада қаламгердің ұрпақтары да өз заманының барша ауыртпалықтары мен асыра сілтеушіліктерін айнытпай, сол қалпында суреттеген Бейімбеттің шығармаларын жіктеп-жіліктеу үшін жіті көз, зерек ақыл, байқампаз ынта қажет екендігін алға тартты. Осы тұста оқушылар мен ұстаздар қауымы Би-ағаның әлемінің құпия-сырын зерттеуге өз үлестерін қосатындығына сенім білдірді.
Одан әрі қонақтар мектептің кіреберісінде жайғасқан «Бейімбет әлемі» интербелсенді алаңын аралады. «Үш бәйтерек» таныстырылымы, «Жас робототехниктер» ізденіс-жобалары, үш тілдегі «Бейімбет Майлин ғұмырнамасы», «Өмір шындығынан өріс тапқан қаламгер» кітап әлеміне шолу, «Шебердің қолы ортақ» көрмесі, «Ақын көкжиегі» лепбугі. Мазмұны терең алаңшалардың қай-қайсысын алып қарасаң да, ұйымдастырушылардың тақырыпты ашуға деген зор талпыныс пен үлкен ізденіс жатқандығын аңғарасың.
Ал «Би-ағаның ғұмыр жолы» портреттік сағаты, «Қазан доп» ұлттық ойыны мен «Бейімбеттану» зияткерлік-блиц турнирі көздері бал-бұл жанған оқушылардың жазушыны танып-білуге деген шынайы қызығушылығын арттыра түскені анық.
Мағыналы шара аясында ұжымның көптен күткен оқиғасы – Майлин атындағы мұражайдың да тұсауы кесілді. Бастысы – тамаша бастамаға қадам жасалды. Алдағы уақытта бұл жер қаламгер жайлы тың деректер мен құнды жәдігерлерге толыға түсіп, рудныйлықтардың рухани қазығына айналары сөзсіз.
Іс-шараның соңы «Арқаның саңлағы – Бейімбет» атты брифингке ұласты.
Толық нұсқасын газетіміздің алдағы санынан оқи аласыздар
Қуаныш ЕСҚАБЫЛ
