AIMAQTA QANDAI HABAR BAR?
Oblysta. Bıyl oblys qalalarynda shaǵyn nesıelendirýge 1301,2 mln teńge bólindi. Ulttyq qordan shaǵyn bıznesti damytý úshin qosymsha 250 mln teńge qarastyrylǵan. Osy jyly oblys kóleminde 142 shaǵyn nesıe berilip, onyń 126-sy ekinshi deńgeıli bankter arqyly, al 16 nesıe "Aýyl sharýashylyǵyn qarjylyq qoldaý qory" aıasynda qoljetimdi bolmaq. Sońǵy segiz aıda jalpy somasy 167,2 mln teńge bolatyn 34 kepildeme rásimdelgen.
Qostanaı. Polısıa departamenti men sot oryndaýshylary "Boryshker" jedel aldyn alý is-sharasyn ótkizýde. Maqsat – ákimshilik aıyppuldardy óndirip alý, ony tóleý tártibin túsindirý. Qazir qostanaılyqtardyń qaryzy – 123 mln teńge. Aksıanyń birinshi kúni 96 quqyq buzýshyǵa habar berilip, onyń 28-i bereshekterin tóledi. Kóbi jol qaýipsizdigi erejesin jáne qoǵamdyq tártipti buzǵan.
Úzdikter sapynan kórindi
Rýdnyı. "Aıat" shaǵyn fýtbol komandasy óz tarıhynda birinshi ret elıtalyq raýndqa ótti. ÝEFA Chempıondardyń fýtzal lıgasynyń negizgi raýndyna ótken 16 eýropalyq komandanyń qatarynan kórindi. Rýdnyılyq aıaqdopshylar Lıtvada úsh oıyn ótkizgen. Olar lıtvalyq "Vıtıs", ıspanıalyq "Barselona", reseılik "Túmen" komandalaryn oısyrata utty.
Jangeldın. Tilep áýlıe Aspantaıulyn kesenesiniń qurylysy aıaqtaldy. Áýlıe beıiti jatqan jerge kesene ornatý jumysyna 10 mln teńge jumsalǵan. Demeýshi – «Tilep» qoǵamdyq qory, jetekshisi – belgili mesenat Sapar Ysqaqov. Ataqty kobyzshynyń beıiti Qarasý okrýginiń Shuqyrkól mekeninen 12 shaqyrym jerde ornalasqan. Áli kúnge deıin syrqat jáne balasy joq adamdar qabir basyna zıarat etip keledi.
Eki zeınetker qaza boldy
Qostanaı a. Oqıǵa Vladımırov aýylynda tún jarymynda bolǵan. Órtenip ketken úı ornynan 71 jáne 69 jastardaǵy erli-zaıypty zeınetkerlerdiń denesi tabyldy. Múrdeler sot-medısınalyq saraptamaǵa jiberildi. Órt elektr symdarynyń qysqa tuıyqtalýynan shyǵýy múmkin. Naqty sebepteri anyqtalyp jatyr. Qutqarýshylar azamattardy elektr symdary men peshterdi ýaqytyly tekserýdi eskertedi.
Qylmys ashyldy
Denısov. Polıseıler 62 jastaǵy áıeldiń ólimine qatysty qylmysty ashty. 19 qazanda tabylǵan marqumnyń kisi qolynan qaza bolǵany anyqtalǵan edi. Ony pyshaqtap ketken. Qylmysqa qatysy bar degen kúdikpen 29 jáne 41 jastaǵy azamattar ustaldy. Olar buǵan deıin isti bolǵan. Kúdiktiler Pereleskı aýylyndaǵy kafede quryqtaldy. Sotqa deıingi tergeý júrgizilýde.
Oqýshylar ıgiligine
Amangeldi. Y.Altynsarın atyndaǵy jalpy bilim beretin orta mektepte zaman talabyna saı jańa geografıalyq alań ashyldy. Sońǵy úlgidegi nysanǵa mektep túlegi Hamıt Ámirjanov 1 mln teńge qarajat bóldi. Geografıalyq alańnyń ashylýyna aýdan ákimdiginiń ókilderi, mektep dırektorlary jáne geografıa pániniń muǵalimderi qatynasty.
