Ауыл күні аталып өтті

 Қарабалық ауданының тұрғындары мен қонақтары «Ауыл күнін»  атап өтті. Былтыр  ауданның құрылғанына 90 жыл толған еді. Оны кең көлемде атап өтті. Бұл жолы да теріскей өңірдің ауыл тойына тыңғылықты әзірленгені байқалады.  Бұл күні аудан орталығындағы бұрынғы қаржы басқармасы болған екі қабатты үйге Ұлы Отан  соғысының  ардагері, Қарабалық ауданында отыз жылдан артық қаржы саласында қызмет істеген Асылбек Темірхановқа ескерткіш-тақта орнатылды.

Салтанатты рәсімге аудан басшылары, қонақтар мен ауыл тұрғындары жиналды. 
Жиналғандар алдында сөз алған  аудан әкімі Нұржан Өтегенов ел ардақтысына жасалған құрметтің лайықты екенін атап өтті.
"Асылбек ағамыз осы ауданда отыз үш жыл бойы табан аудармай, 1980-жылға дейін қызмет атқарып, үздік экономист атанды. Ол кісінің өңірдің өркендеуіне қосқан үлесі қомақты. Сондықтан, мұндай кісіге қандай құрмет көрсетсе де жарасады", -деді аудан басшысы.Бұдан соң аудан мерейтойы орталық алаңда жалғасты. Онда əр мекеме мен көше тұрғындары қолдарына түрлі транспоранттар мен Қарабалық өңірінен шыққан атақты азаматтардың портреттерін, əр түрлі безендірілген атрибуттар ұстап алаңнан шерулетіп жүріп өтті. Жиналғандарды аудан әкімі құттықтап, өңірдің арғы-бергі тарихы мен қол жеткізген табыстарына тоқталды. Ол бір топ аудан тұрғындарына арнайы сый-сияпат жасады. Мереке одан әрі концерт жəне ұлттық ат спорты ойындарымен жалғасты.