Сахнада – өнерлі отбасылар

“Мирас” мәдениет сарайында облыстық “Өнерлі отбасы” мұғалімдер отбасының форумы өтті.

Аталмыш шара елімізде аталып өтетін Отбасы мерекесіне арналған. Онымен қоса мұғалімдер күні, Тәуелсіздіктің 25 және облыстың 80 жылдығын да тоқайластырып отыр. Сайысқа барлығы 32 отбасы қатысқан екен. Олар – облыстың әр аймағынан келгендер. Қатысушылар 3 кезең бойынша сынаққа түсіп, бүгінгі күні үздіктер түрлі номинация бойынша марапатталды.

 

Оның ішінде “Оқытушылар отбасы”, “Шығармашыл отбасы”, “Спортшылар отбасы” сияқты әр саладан көрініп жүрген жанұялар жетерлік. Олар өздерін таныстырып бейнебаян түсіріп, өзге де талаптарды орындаған.

Байқауға қатысқан жанұялардың бірі – Алтынсарин ауданын келген Жақсылықовтар отбасы. Олар бүгінгі шараға ерекше дайындықпен келген. Отағасы Зейнеке Хамза – Обаған ауылының әкімі. Отанасы қобызшы, үлкен қызы да қобызшы, үлкен баласы өлең айтады. Кіші ұлы да, кенже қызы да өнерлі. Төрт бала тәрбиелеп отырған Жақсылықовтардың үйінде отбасылық дуэт те бар. Бүгін олар биді де билеп, қобызда да ойнап береді.  

 

Отбасы құндылықтары – біздің басты байлығымыз. Әр үйде өсіп келе жатқан ұрпақ Отан ең алдымен отбасынан басталатынын сезініп ер жетсе елінің болашағы болары сөзсіз. Бүгінгі шараның ұстанған басты мақсаты да осы құндылықты дәріптеу.

 

Айтолқын АЙҚАДАМОВА

Суреттерді түсірген Бағдат АХМЕТБЕКОВ