Ұстаздарға тағызым
Қостанай қаласында мұғалімдердің кәсіби мерекесіне орай салтанатты жиын болып өтті. Мерекелік шараға қатысқан өңір басшысы А.Б. Мұхамбетов барша ұлағатты ұстазды құттықтап, марапаттады.
–Шәкірттерге білім беріп, жақсы қасиеттерді бойына дарытатын және тәлім мен тәрбие беретін ол ең алдымен – мұғалім. Қазақта «Ұстазы жақсының – ұстамы жақсы» деген сөз бар. Ұрпақ тәрбиесі жолында қызмет етіп келе жатқан ұстаздардың рөлі де ерекше. Сондықтан, ұстаздар күні – орны бөлек, дәрежесі биік, ең ұлық та ұлағатты мереке. Облыстың 21 білім ошағын жөндеу жұмыстарына биыл 2 млрд 700 млн теңге бөлінген. Бұл былтырғы жылмен салыстырғанда үш есеге көп. «Дипломмен – ауылға» бағдарламасы аясында 600-ге жуық жас маман бір реттік көтермеақы алды. Облыста меценаттардың көмегімен 62 ІТ сыныбы мен 25 робот-техникалық сыныптары ашылған. 16 оқушы халықаралық және 53 бала республикалық ғылыми сайыстарда жоғары орындарға ие болған. Осындай оқушыларды дайындаған ұстаздардың еңбегі көп, – деді өз құттықтауында аймақ басшысы.
Мұғалім мәртебесін және мұғалім мамандығының беделін көтеру мақсатында аудандар мен қалалардың білім бөлімдерінің басшылары, облыстық білім беру ұйымдарының директорлары, педагогикалық еңбек ардагерлері, педагогикалық жұртшылық «Ы. Алтынсарин» және «Қазақстан Республикасының білім беру ісінің құрметті қызметкері» төсбелгілерімен, облыс әкімі А.Б.Мұхамбетовтың грамоталарымен және сыйақылармен, ҚР Білім және ғылым министрлігінің грамоталары мен алғыс хаттарымен мадақталды.
Бүгінгі мерекеде «Ы. Алтынсарин» төсбелгісін иеленген Рудный әлеуметтік-гуманитарлық колледжінің директоры Жомарт Құсайынов білім беру саласында 20-дан артық қызмет етіп келеді.
–Бүгінгі төл мерекемен барша ұстаздар қауымын құттықтағым келеді. Өзім Ы.Алтынсарин атындағы колледждің түлегімін әрі сол оқу орнында басшылық қызмет атқарудамын. Биыл колледждің 80 жылдық мерейтойында осындай тамаша сый құрметке бөленіп жатқаным қуантады. Бұл 80 жылдық тарихы бар колледж ұстаздарының мәртебесі, одан қалды Ыбырай ұрпақтарының еңбегі. Ұстаздық салада еңбек етіп жүргеніме 20 жыл болған екен. Соның ішінде он жылымды осы колледжге арнаудамын, – деп қуанышымен бөлісті «Ы.Алтынсарин» төсбелгісінің иегері Жомарт Құсайынов.
Облыстың үздік мұғалімдерінің құрметіне Абай атындағы Мемлекеттік академиялық опера және балет театрының солистері өнер көрсетіп, тамаша көңіл күй сыйлады. Жастар сарайының фойесінде филармонияның Камералы ансамблі өнер көрсетіп, облыстың үздік педагогтерінің жетістіктері көрсетілетін виртуалды «Даңқ аллеясы» жұмыс істеді.
Айтолқын АЙҚАДАМОВА
Суреттерді түсірген Бердіболат КӨРКЕМБАЕВ
