«Эко-сағат» акциясы өтті

by Qostanaı tańy · 03.10.2019

Кеше облыстың барлық мектептерінде «Эко-сағат» кең көлемді республикалық акция басталды. Бұл ауқымды шараға ұстаздар, оқушылар мен студенттер белсенді атсалысты.

Айта кету керек, экологиялық сағат өткізу – Қазақстан Республикасы экология, геология және табиғи ресурстар министрлігің, қоғамдық маңызды бастамаларды дамыту қорының, экологиялық ұйымдар қауымдастығының бірлескен бастамасы. Бірыңғай республикалық экологиялық сағат аясында облыстың барлық оқу орындарында экология тақырыбында сабақтар өтті. Оқушылар табиғат туралы бейнероликтер көрді. Облыстың аудан-қалаларының мектеп жанындағы учаскелеріне 25 мың көшет егілді.

Биыл ғана ашылған Әуежай шағынауданындағы №29 орта мектеп маңына көшет отырғызуға облыс әкімі А.Мұхамбетов келді.

– Дана халқымыз «Бір тал кессең, он тал ек» деп, қоршаған ортаны қорғауға, табиғатты аялауға ерекше мән берген. Бүгінгі шара да сол игі дәстүрді жалғастырып, мектеп аулаларында жас көшеттерді егуге бағытталып отыр. Бұл бүгінгі ұрпақтың ғана емес, келер ұрпақтың игілігі үшін жасалып отырған маңызды қадам деп білемін. Ағымдағы жылдың мамыр айында Қазақстан-Ресей жастарының форумы қарсаңында Қостанай және Қорған облыстарының аумағында екі елді біріктіретін Тобыл өзенінің бойында "ECO – challenge Qostanai" өтті. Челленджге облыстың 8 қаласы мен ауданының жастары белсенді қатысты. Ол еліміздегі барлық өзендер мен көлдердің жағалауларын тазалауға бағытталған "Qazaqstan sylary" жалпы қазақстандық жастар қозғалысының бастапқы алаңына айналды, – деді А.Мұхамбетов.