Жас мамандар тұрғын үймен қамтылды
Алтынсарин ауданында тұрғын үй құрылысы да дамыған. Осыдан екі жыл бұрын екі қабатты баспана қайта жөндеуден өтіп, жас отбасыларға, жас мамандарға, көп балалы аналарға берілген болатын. Кезекте тұрғандар ауданнан баспана алып, қуанып қалды. Осылай пәтерге қол жеткізген жанның бірі – Әсем Үсенова еді. Халыққа қызмет көрсету орталығында еңбек ететін Әсем жас отбасы ретінде 2 бөлмелі пәтер алды.
– Қаладан еш айырмашылығы жоқ. Ыстық, салқын суы бар. Мектеп жақын, жұмысымыз қасымызда. Бұл үйде 16 пәтер бар. Барлығында кілең жас мамандар, жас отбасылар тұрады, – дейді Әсем.
Осы пәтерлердің кілтін облыс әкімінің өзі тұрғындарға табыс еткен еді. Бір әттеген-айы жап-жаңа үйдің ауласын шөп басып, күтім көрмей кеткен екен. Бір үйде тұратын жастар бірігіп, гүл егіп, үй ауласын жарқыратып қойса қандай жақсы болар еді деген қынжылыс болды біздің тарапымыздан.
