Әріптесіміз жеңімпаз атанды

Қазақ баспасөзінің қарашаңырағы – республикалық "Egemen Qazaqstan" газетінің 100 жылдық мерейтойына орай ұйымдастырылған "Тіл тарихы: жүз жылдық жылнама" мақалалар байқауы қорытындыланды. Облыс тілшілері арасында әріптесіміз, "Қостанай таңы" газетінің белді журналисі Қасқырбай Қойшыманов 1-орынды иеленді.

 

Еліміздің ғасырлық тарихы бар бас газетінің бастамасын облыстық Тілдерді дамыту басқармасы қабыл алып, өңір журналистері арасындағы үздіктерді іріктеді. Кәсіби шеберлік, терең талдау, салмақты сараптауды қажет ететін байқауға облыстың аудан-қалаларынан 9 тілші қатысқан. Солардың жетеуі марапатқа лайық деп танылыпты. Мақалаларды "Egemen Qazaqstan" газетінің Қостанайдағы меншікті тілшісі Нәзира Жәрімбетова, Қазақстан жазушылар одағының ҚОФ директоры, белгілі қаламгер Ғ.Ахметчин және А.Байтұрсынов атындағы ҚМУ оқытушысы Гүлшат Марқабаевалар сыннан өткізіп, үздіктерін іріктеген. Марапаттау рәсіміне дейін Н.Жәрімбетова мерейлі газеттің бас редакторы Дархан Қыдырәлінің атынан құттықтау лебізін жеткізді.

" Бұл –  Сәкен Сейфуллин, Тұрар Рысқұлов, Бейімбет Майлин сынды көптеген қабырғалы қаламгерлердің қолтаңбасы қалған басылым. "Ұшқын", "Еңбекші қазақ", "Социалистік Қазақстан" кездерінен бері халықтың тынысына айналып келді. Осы уақытқа дейін 38 басшы газеттің тұтқасын ұстапты. "Egemen Qazaqstan"-ды елдің газеті және биліктің "Бұқар жырауы" десек болады. Сондықтан, осы байқау ата басылымның бүгінгі жас тілшілерге берген батасы болсын деп тілеймін", – деді Нәзира апамыз.

"Қарашаңырақтың жүз жылдық мерекесі құтты болсын! Бұл байқауды бас газетпен бірлесе ұйымдастырып отырмыз. Облыс тілшілеріне қанат бітірген шараның жүзеге асуына түрткі болған басылымға облыстық Тілдерді дамыту басқармасы атынан алғыс айтамыз. Алғашқы саны шыққан күннен бастап қазақ тілінің дамуына ерекше үлес қосып келе жатқан "Egemen Qazaqstan" газетінің ұлтымыз үшін қашанда құнды", – деп лебізін білдірді облыстық Тілдерді дамыту басқармасының басшысы Г.Мендекинова.

Кезек марапаттау рәсіміне беріліп, байқауға қатысқаны үшін Мешіт Ғазиз бен Гүлнар Құрманғазиева "Алғыс хатпен" марапатталды. "Амангелді арайы" аудандық газетінің тілшісі Әнет Жұмабеков "Егеменнің кейіпкері" аталымымен, "Лисаковская новь" басылымының журналисі Айман Қадырханова "Жас қалам" номинациясы бойынша марапатталып, ақшалай жүлде (10 мың теңге) иеленді. Жүлделі 3-орын "Наш Костанай" газетінің тілшісі Аягөз Кәкімжановаға бұйырды. Оған 50 мың теңгенің сертификаты табыс етілді. 2-орын облыстық "Qostanai" телеарнасының корреспонденті Нұрқанат Бұқабаевтың еншісінде. Қоржынын 70 мың теңгемен майлады. Ал облыстық "Қостанай таңы" газетінің тілшісі Қасқырбай Қойшымановтың етжеңді мақаласы 1-орынды жеңіп алды. 100 теңге қанжығасына байланды.

 

"Бір байқау аясында ғасырлық тарихы бар газеттің ғұмырын қамтып жазу мүмкін емес. Алайда қал-қадірімізше архивті ақтарып, ықтиярмен ізденіп бақтық. Мәселен, менің конкурстық материалымның өзегі сонау 1979 жылы Жайнақов деген автордың тілге қатысты үндеу материалы болды. Онда ол сол кездің өзінде қазақ әліпбиін латыннегізді қаріпке көшіру идеясын ұрандата жазған екен. Тура қырық жыл бұрынғы бұл мәселенің бүгіндері қандай мән-маңызға ие болып отырғаны баршамызға мәлім", – дейді жеңімпаз әріптесіміз.

Суреттерді түсірген Бердіболат Көркембаев