«Qorgau» – халық көмекшісі

Қостанай облысында азаматтардың құқығын қорғауды қамтамасыз етуге арналған «Qorgau» жобасының басталды. Бұл туралы өңірлік коммуникациялар орталығында өткен брифингте «ГрИн» азаматтар альянсы қоғамдық қорының өкілдері мәлім етті.«Qorgau» – халық көмекшісі. Ол 200-ден астам өзекті тақырыпты қамтиды. «ГрИн» төрайымы Динара Өтебаеваның сөзінше, жобаның сайты және мобильдік қосымшасы болады.

– Бұл жоба «Азаматтық бастамалар орталығы» КЕАҚ-ның қолдауымен іске асты. Арнайы грант бөлінді. Мақсаты – қиын жағдайға түскен тұрғындардың құқықтық сауатын көтеру. ҚР Ақпарат және қоғамдық даму министрлігі мен «Еurasian Expert Council» қоғамдық қоры негізгі жұмыстарды қадағалап отырады, – дейді Динара Өтебаева.

Ал азаматтар альянсы заңгері Мұратхан Бақытжанұлы айтқандай, қазіргі кезде тұрғындар заң тұрғысында сауатсыздықтарға жол беріп жатады. Оны, әсіресе, әлеуметтік желілерде байқауға болады.

– Осыған байланысты 2019 жылдың 1 тамызынан бастап елдің барлық қала-ауданында 210 заңгерлік кеңес беру бөлімі ашылады.Қостанай облысында мұндай бөлімдер жастар ресурстық орталықтарында орналасады. Қазір тиісті орындар дайындалған. Жоба шеңберінде заң факультетінің студенттеріне тәжірибеден өту мүмкіндіктері де қарастырылған.

 

Қасқырбай ҚОЙШЫМАНОВ