Арқалық театры Қостанайда

Тобыл өңіріне Арқалық қалалық қазақ жасөспірімдер театры келіп, талғамы жоғары қостанайлық көрермендердің назарына бірнеше қойылымдарын ұсынуда.

 І. Омаров атындағы облыстық қазақ драма театрының директоры Н. Ерекешевтің айтуына қарағанда, арқалықтық әртістер театрдың жаңа ғимаратында алғаш рет болуы екен. Сондықтан бұл үлкен қуаныш болып отыр. Өнер сүйер қауымға қонақтар бірнеше қойылым әкелген. Оның ішінде балаларға арналған ертегі де бар. “Қарлығаштың жылы ұясы” атты ертегісі қос тілде қатар қойылады. Ал ересектерге “Әттең, қысқа ғұмыр-ай” комедиясы мен “Қос мұңлық” драмасы арналмақ.

         –Бүгін Қостанай жеріне келіп отырғанымызға қуаныштымыз. Жаңа ғимаратта көрермендерге қойылымдарымызды ұсынбақпыз. Қостанай қаласынан соң 12-13 қыркүйекте Затобол кенті мен Заречный поселкесінде болу жоспарымызда бар, – дейді Арқалық жасөспірімдер театрының директоры Зекен Сейтбекұлы.

 

Айтолқын Айқадамова