«Мерейлі отбасы» байқауы мәресіне жетті

by Qostanaı tańy · 24.05.2019

Өңірімізде «Мерейлі отбасы-2019» ұлттық байқауының облыстық кезеңі мәресіне жетті. Еліміз бойынша алтыншы мәрте ұйымдастырылған байқаудың түрлі деңгейлерінде Қостанай облысынан 600-ден аса отбасы қатысып үлгеріпті. Осы жолы да облыс аумағындағы аудандар мен қалаларда «Мерейлі отбасы» байқаулары өтіп, одан үздік шыққандар байқаудың облыстық кезеңінде бақтарын сынасты. Үздік шыққандарды облыс әкімінің орынбасары Марат Жүндібаев құттықтап, сый-құрмет көрсетті.

«Мерейлі отбасы-2019» байқауының соңғы марапаттау сатысына жиналғандарды облыс әкімінің орынбасары Марат Жүндібаев құттықтады.

«Қоғамда жақсы қасиеттің барлығы да отбасында қалыптасады. «Мерейлі отбасы» байқауының осыған дейінгі жеңімпаздары болған отбасылар көпке үлгі және ұлттық байлығымыз болып саналады. Биыл отбасы құндылықтарын насихаттау мақсатында "Нұр отан" партиясы "Бақытты отбасы" жобасын қолға алды. Қазір осы жоба бойынша өңірімізде 28 көп балалы отбасы тұрғын үймен қамтамасыз етілді. 14 отбасының пәтеріне күрделі жөндеу жүргізілді. 200-ге жуық отбасына материалдық көмек көрсетілді», – деді Марат Қонысбайұлы.

Дәстүрлі ұлттық байқаудың 3 аталыммен өтетіні белгілі. «Өнегелі отбасы» аталымы бойынша Жанкелдин ауданынан Баймағамбетовтер отбасы жеңімпаз атанды. Оларға 150 мың теңгенің сертификаты табыс етілді. Жасы жетпіске таяса да, еңбектен қол үзбеген ардагер зілтемірші Мәлік Баймағамбетов жастайынан спортқа жақын өсті. Оның ауыр атлетикаға деген қызығушылығы мектеп қабырғасынан басталды.

"Ауылға үй тұрғызуға шешен азаматтары келді. Олар трактордың темір доңғалақтарын емін-еркін көтеріп жүре беретін. "Бұл менің де қолымнан келеді", – дедім. Күндегі ермегім темір-терсек көтеру-тін", – деп еске алды спортшы өткен шағын.

«Парасатты отбасы» аталымы бойынша 150 мың теңгенің сертификаты Айтжан мен Ерболат Кішкентаевтар отбасына берілді. Айтжан – өзін-өзі тану пәнінің мұғалімі. Ал Ерболат Кішкентаев ширек ғасырға жуық құқық қорғау саласында еңбек етті. Осыдан бір жарым жыл бұрын ата-ана қамқорлығынан айырылған 3 баланы бауырларына басты.

Ал «Мерейлі отбасы» аталымының жүлдесіне Федоров ауданының тұрғыны Бубликтер отбасы лайық деп танылды. Федоров ауданының құрметті азаматы Василий Бублик жастайынан еңбекке араласты. Білікті диқан дәнді дақылдардың жоғары сапалы егін, жер өңдеуге жету, жаңа өндіріс технологиялар мен ылғал ресурс үнемдейтін техниканы қолдана отырып, жоғары егін жинауда үздік көрсеткіш көрсетті. Жыл сайын Федоров ауылының әлеуметтік саласын дамытуға және абаттандыруға, қайырымдылық шараларына белсене араласады.

Бубликтер отбасына облыс әкімінің орынбасары Марат Жүндібаев 300 мың теңгенің сертификатын табыс етті.