КӨП БАЛАЛЫ 20 ОТБАСЫ БАСПАНАЛЫ БОЛДЫ
Облыс әкімі Архимед Мұхамбетов көп балалы 20 отбасына пәтер кілттерін табыс етті. Қасиетті ораза айында үлкен қуанышқа кенелген алтын алқалы аналарға «Юбилейный» шағын ауданындағы жаңа бой көтерген көп қабатты зәулім үйден баспана бұйырды. 
Архимед Мұхамбетов кілт табыстау салтанатында пәтер иелерін құттықтап, әр отбасына көл-көсір қуаныш, бақ-береке тіледі.
«Бүгін біз Жеңіс күні мерекесі қарсаңында, көп балалы жанұяларға жаңа көпқабатты тұрғын үй пәтерлерінің кілтін тапсыру салтанатты рәсіміне жиналып отырмыз. Соңғы кездері осындай маңызды іс-шаралардың қаламызда, жалпы өңірімізде жиі өткізілетіні дәстүрге айналып отыр. Өйткені қарқынды дамып келе жатқан тұрғын үй құрылысы алдағы уақытта осындай игі бастамалардың көбеюіне негіз болатыны сөзсіз. Осы уақытқа дейін қаламызда «Нұрлы жер» бағдарламасы аясында мемлекеттік тұрғын үй құрылысы саласында біраз жұмыстар атқарылды. Мемлекеттік қолдаудың арқасында жаңа әрі қолжетімді үйге ие болған жанұялардарың саны жыл сайын артып келеді. Бұдан бөлек «7-20-25», Тұрғын үй құрылыс жинақ банкі арқылы қолжетімді баспанамен қамтамсыз ету бүгінгі таңда жолға қойылып отыр.Сондықтан баршаңызды осы игілікті іс-шарамен құттықтай отырып, зор денсаулық, еңбекте табыс және осындай әлеуметтік маңызды оқиғалардың мейлінше көбірек болуын тілеймін!» – деді өңір басшысы.
Салтанатты шарадан кейін облыс әкімі көп балалы ана Сайранкүл Нұғыманованың пәтеріне бас сұқты. Бүгінде ол 4 бала, екі немере тәрбиелеп отыр. Өзі «Баян сұлу» кондитерлік фабрикасында жұмыс істейді. Отағасы – құрылысшы. 
«Міне, бүгін жаңа баспанаға қолымыз жетіп, қуанышты болып жатырмыз. Қасиетті ораза айында жарық та сәулетті пәтерге кіруімізге себеп болып жатқан мемлекет басшыларына, облыс әкіміне, осы үйді тұрғызған құрылысшыларға алғыс айтамын", – дейді ол.
Бүгінде Қостанай қаласында 730 көп балалы отбасы бар. Оның 470-і баспана кезегінде тұр. Биыл облыс орталығында 80 көп балалы отбасын тұрғын, үймен қамту жоспарланған. Жыл соңына дейін Қобыланды батыр көшесінде салынып жатқан көп қабатты тұрғын үйден 10 пәтер, Узкоколейный көшесіндегі жаңа үйден 30 пәтер көп балалы отбасылар игілігіне берілмек.
Нұрқанат Құлабаев
Суреттерді түсірген Бағдат Ахметбеков
