Бірлігімізге кепіл болар сайлау күтеміз

Мемлекет басшысы Қасым-Жомарт Тоқаевтың кезектен тыс ҚР Президенті сайлауын өткізу жөніндегі Қазақстан халқына үндеуін тыңдап шықтым. Әлемдік тәжірибеде екі ай уақыт аралығында сайлау өткізу тым қысқа саналады. Дегенмен, тәуелсіздік алған жылдардан бері талай тосын үндеулер, тарихи мәлімдемелер, соның ішінде кезектен тыс сайлаулардың өткені белгілі. Қазақстан осы сындарлы жолдардың барлығын бейбіт түрде басынан өткеріп келеді. Әсіресе, қазіргідей жаһандағы мың құбылып тұрған саяси жағдайларға қарап, мемлекетіміздің жарқын болашағы үшін халық бәрібір өз таңдауын жасау керек. Бүгінгідей әлемдегі дағдарыстар, геосаяси жағдайлар ушығып тұрған шақта біз ықылым замандардан келе жатқан толеранттық қасиетімізді тағы бір мәрте сақтап, дүниежүзі жұртшылығының алдында бейбіт сайлауымыз арқылы өзіміздің ынтымағымызды дәлелдеп беруіміз қажет.

Расында Ел Президентінің «кезектен тыс сайлау туралы шешім қабылдау – өте маңызды әрі қажетті қадам» деуі орынды. Ұлыстың ұлы күні қарсаңында ғана Елбасы Нұрсұлтан Назарбаев өз орнын босатып, үлкен тарихи шешім қабылдады. Ұлт көшбасшысы мемлекет басына жаңа буынның келіп, жаңашыл идея мен тың реформаның көрініс табуынан зор үміт күтіп отыр. Ал 9 маусымнан кейін билік басына келетін тұлға өзіне артылған үлкен жауапкершілікті арқалап, бұған дейінгі жүзеге асырылған саясатымызды ел-жұртпен бірге жарқын болашаққа бастайтынына сенімім зор.

Егер Қазақстан бұл жолы да сайлау науқанын ойдағыдай әділ әрі ашық түрде өткізсе, еліміздің әлем алдындағы беделі бұрынғыдан арта түсері сөзсіз. Сол себепті, барша жерлестерімді мызғымас бірлігімізбен бұл саяси додаға да белсенді қатысып, өзіміз қалаған ел басқарушымызды сайлап алуға шақырамын.

 

Манапбек Кәдіров,

Е.Өмірзақов атындағы облыстық филармонияның әншісі,

халықаралық байқаулардың лауреаты