Жаңашыл істердің жаршысы 

Қостанайда жыл сайынғы ауылшаруашылық көрмесі басталды. Өңірлік көрме биыл осымен бесінші рет ұйымдастырылып отыр. Шара ауылшаруашылық өндірісіндегі барлық бағыт – цифрландыру, ауылшаруашылық техникалары мен құрал-жабдықтар, тыңайытқыш, ветеринарлық технология, мал шаруашылығына қажетті заттарды қамтиды.

      

Көрмеге еліміздің Алматы, Нұр-Сұлтан, Қарағанды, Павлодар, Көкшетау, Петропавл қалаларындағы компаниялармен қатар Ресей, Украина, Беларус, Татарстан республикаларының өкілдері келді. Олардың арасында ауылшаруашылық техникалын өткізумен айналысатын әрі тыңайтқыш өндіретін «IMEXGroup» ЖШС, «Омичка» тырмаларын жасайтын омбылық «Л-АГРО» ООО компаниясы, «ТПК Евросибагро» тәрізді жетпіс шақты  ірі өндіріс орнының мамандары бар. Олар өздері шығарған өнімдерін көрмеге келушілердің назарына ұсынды. Мәселен, «BayDala» ЖШС түрлі сұйықтықтарды сақтауға арналған эластикалық резервуарларды таныстырса, «Композит Групп Казахстан» ЖШС  «Беларус» тракторының алты түрлі моделін және «Палессе» комбайынын көрсетті. Қостанайдағы «Олжа-Агро» ЖШС «Тауфун» сұрыптағышын, сыдыра жыртқыш пен фронталь тиегіштерін әкеліпті. Ал көкшетаулық «BHKAgroAG» ЖШС өкілдері AF 4088 модельді CASEIH астық жинайтын комбайынын таныстырды.

         -Жалпы, соңғы үлгідегі CASEIH комбайындары егін орағына таптыртпайтын техника. Бұлардың біреуі бір маусымда 2,5 мың гектардың өнімін жинай алады. Өте ауқымды. Бағасы да ауылшаруашылық тауар өндірушілері үшін аса қолайлы, – дейді америкалық фирманың біздің облыстағы ресми дилері Сергей Пивоваров.

          Өңірлік көрмені тамашалауға облыс ауылшаруашылық тауар өндірушілерімен бірге, көршілес облыстардың фермерлері де келіпті. Өйткені, көктемгі дала жұмыстары алдында бұл таптырмас мүмкіндік екені сөзсіз.

          -Мұндай көрмелер керек. Неге десеңіз, қазіргідей технология күннен күнге дамып жатқан тұста біз сияқты кәсіп иелеріне жаңа заманның техникалары өте қажет. Келіп көріп жатырмыз, танысып жатырмыз. Реті келсе алу ойда бар. Қалайда, техника паркін әлсін-әлсін жаңалап отыру жұмыс өнімділігін арттырары сөзсіз,-дейді байырғы ауылшаруашылық қызметкері, фермер Жауғашты Қалиев.

       

Көрмеге келгендер алдында облыс әкімінің бірінші орынбасары Ғауез Нұрмұхамбетов те сөз алды. Ол жауапты науқан алдындағы шараның маңыздылығына ерекше тоқталды.

         -Бұл көрме біздің ауылшаруашылық тауар өндірушілері үшін өте қажет. Өйткені, уақыт озған сайын өмірге жаңа технологиялар енгізілді. Өздеріңіз білесіздер, кейінгі жылдары елімізде ауылшаруашылық саласы қарқынды дамып үстінде. Мемлекеттің өзі  ауылшаруашылық саласын дамытуға үлкен қолдау білдіріп келеді. Еліміздің тұңғыш президенті-Елбасы 2022 жылға қарай жұмыс өнімдігін ек жарым есеге арттыруды тапсырды.  Біз осы үдеден шығуды көздейміз. Ол үшін осындай игі шараларды жиі ұйымдастыру керек,-деді облыс әкімінің бірінші орынбасары.

          Өңірлік көрмеге күн ұзаққа созылады.

 

Әлібек ЫБЫРАЙ

Суреттерді түсірген Бердібрлат КӨРКЕМБАЕВ