Аяулы аналарға арналады

Достық Үйінде этномәдени бірлестіктердің өкілдері Халықаралық әйелдер күнін атап өтті. Қазақстан халқы Ассамблеясының қыз-келіншектеріне арнап, қаламызға танымал эстрада әртістері мен кішкентай өнерпаздар ән шырқап, би биледі. Достық Үйінің фойесіне әйел портреттерінің көрмесі де қойылған.

Мереке иелерін құттықтауға этномәдени бірлестіктердің төрағалары да келді. Олар жылы лебіз-тілектерін айтты.

– Сіздерді Халықаралық әйелдер күнімен шын жүректен құттықтаймын! Әрқайсыңызға мықты денсаулық, отбасылық құт-береке және әйел бақытын тілейміз. Жанұяларыңызда тыныштық пен жылулық болсын, еңбекте және балалар тәрбиесінде табысқа жетіңіздер! Әр күндеріңіз өздеріңіздің айналаңыздағы адамдардың сүйіспеншілігі мен қамқорлығына толы болсын, – деді қазақ этномәдени бірлестігінің төрағасы Қалқаман Жақып.

 

Қалыптасқан үрдіс бойынша, бір де бір мереке қара домбырасыз өтпейді. Наурызбай Әмірхамзин қазақ күйлерін орындады. Сондай-ақ,"Триумф" балалар сән театры, "Индиго" хореографиялық студиясы, "Прима" бірінші Қостанай балет мектебі, "Горцы Ахыска" кавказ би студиясының шәкірттері мың бұралып би билеп, мерекелік көңіл күй сыйлады. Кеш соңында "Біз сіздерге бақыт тілейміз!" атты әннің орындалуы мерекелік бағдарламаның тамаша қорытындысы болды.

 

Әсел Қибаш