AIMAQTA QANDAI HABAR BAR?
Forým yntymaqqa úndeıdi
Oblysta. Osy jyldyń mamyr aıynda oblys ortalyǵyndaǵy Jastar saraıynyń saltanatty ashylýyna oraı Qazaqstan men Reseı jastarynyń yntуmaqtastyq forýmy ótedi. Oǵan eki elden barlyǵy 500-den astam delegat qatysady dep kútilýde. Oblys basshylyǵy aıtýly sharaǵa barlyq aýdan-qala ákimderin belsendi atsalysýǵa shaqyrdy.
Kómektiń kishisi bolmaıdy
Rýdnyı. Polısıa qyzmetkerleri qalada turatyn Torybaevtar otbasyna baryp, materıaldyq kómek kórsetti. Olar páter jaldap turady. Turmystary tómen. Tártip saqshylary qarajat jınap, otbasyny azyq-túlikpen qamtamasyz etti. Sondaı-aq, komýnaldyq qaryzdaryn óteýge kómektesti. Olar reıd kezinde osyndaı alty otbasyny anyqtaǵan. Barlyǵyna járdem kórsetý josparlanyp otyr.
Saýaptan dám etkender
Lısakov. Jamaǵat kúndelikti namazǵa ǵana kelip qoımaı, meshit tirshiligine de mán berýde. Aınalasyn qardan tazartýǵa bir kisideı jumylyp júr. Kúnniń sýyǵyna, aıazǵa qaramaı, meshit tóńiregin taza ustaýǵa tyrysady. Olar jaz aılarynda ǵıbadat nysany mańyn óz erikterimen abattandyrýǵa, ósimdikterge kútim jasaýǵa nıet etip otyr.
Adasqannyń aıyby joq…
Áýlıekól. Qusmuryn túzeý mekemesinen jazasyn ótep shyqqan bes azamat áleýmettik joba qatysýshysy atandy. "Qaqpa aldyndaǵy kezdesý" dep atalatyn joba sottalǵandardy beıimdeýge kómektesedi. Olar jumysqa turyp, qujattaryn túgendep, medısınalyq járdem, turmysyn jaqsartýǵa múmkindik alady. Mamandar olarǵa paıdaly keńester berdi.
Keshen kesenemen irgelespek
Amangeldi. Keıki batyr kesenesi qasynan úlken arnaıy keshen salynbaq. Naqtysynda, mýzeı, kórme, kınozal, turǵyn úı jáne 9 oryndyq panteon josparlanyp otyr. Keshen aýmaǵy 500 sharshy metr bolady. Bas demeýshi – belgili mesenat Sapar Ysqaquly. Jobany úılestirýshi – Saǵyndyq Smaıyluly. Al aýdan ákimi Á.Asanov 100 mln teńgeniń jobasy áli resmı bekitilmegenin aıtty. Maquldaýdan ótse, jergilikti bılik qoldaý bildirýge daıyn.
