Университетте – жаңа басшы

А.Байтұрсынұлы атындағы Қостанай мемлекеттік университетіне жаңадан ректор тағайындалды. Бұл лауазымды профессор Алма Іргебайқызы Досжанова басқаратын болады. Бұған дейін ол Қостанай политехникалық жоғары колледжінің директоры лауазымын атқарған. Облыстық мәслихат депутаты.

Жаңа басшыны таныстыру үшін Астанадан ҚР Білім және ғылым Вице-министрі Бибігүл Асылова өңірімізге келді.

– ҚР Білім және ғылым Министрінің 2019 жылдың 24 қаңтарындағы №16 бұйрығына сәйкес Алма Іргебайқызы Досжанова А.Байтұрсынұлы атындағы Қостанай мемлекеттік университетінің ректоры болып тағайындалды. Алма Іргебайқызының есімі Қостанай өңірінде ғана емес, еліміздің білім саласында кеңінен белгілі. Осы білім ордасының түлегі, осында экономика және қаржы факультетінің деканы, экономикалық зерттеу орталығының директоры қызметтерін атқарды. Білім мен тәжірибеге бай білікті маман өзінен бұрынғы ректорлардың ізін жалғастыра береді деген сенім артамыз, – деді Вице-министр.

 

Б.Асылова сондай-ақ, бұған дейін білім ордасын басқарған техника ғылымдарының докторы Құсайын Уәлиевке зор алғысын білдіріп, иығына шапан жауып, сый-сияпат көрсетті. 2001 жылдан бері араға үзіліс салып университетке жетекшілік етіп келген Құсайын Хасенұлы бұдан былай университеттің қадағалаушы кеңесінің мүшесі болып қала береді әрі өз мамандығы бойынша кафедра профессоры болып еңбек ететін болды.

Қыдырбек Қиысханұлы